Tërmeti 26 Nëntor 2019

Më 26 Nëntor 2019 një ndër tërmetet më të fuqishëm në historinë e vendit tonë goditi Shqipërinë duke lënë pas 51 viktima dhe miliona dëme materiale në ndërtesa. Bashkimi i Prodhuesve Shqiptarë shpreh keqardhjen mbi ngjarjet e ndodhura dhe filloi menjëherë me punën për të arritur në një mënyrë ndihmese. Kështu Bashkimi i Prodhuesve ndërtoi një mensë në Thumanë në kohë rekord, duke i ofruar ushqime të ngrohta të sapogatuara për 3 vakte në ditë banorëve të një ndër zonave më të prekura nga tërmeti. Për plot 6 ditë mensa ishte aktive, kjo dhe falë ndihmës së vullnetarëve të shumtë që u vetëofruan. Tryeza të shtruara me ushqim të ngrohtë, ujë dhe pije të shërbyera nga vullnetarët në mensën e Bashkimit të Prodhuesve Shqiptarë.
Një falënderim nga zemra për gjithë vullnetarët për punën e palodhur dhe mbështetjen që i japin qytetarëve të Thumanës. Pas 6 ditësh mensa në Thumanë u mbyll, por jo ndihma që Bashkimi i Prodhuesve ofroi për të prekurit nga tërmeti. Asambleja e organizatës sonë mblodhi dhe dhuroi plot 500.000 Euro në portalin e-Albania, kjo e pasuar nga 100.000 Euro të tjera që u dhanë ditën që u organizua “Koncert për një tragjedi”.