Përveç shërbimit të thirrjeve, opsionet e komunikimit telefonik dhe online me Administratën Tatimore, DPT njofton edhe hapjen e rubrikës “Tatimet këshillojnë”, në faqen zyrtare të saj dhe në Facebook.

Ky kënd njoftimesh online do të prezantojë për të gjithë tatimpaguesit apo dhe individët, një informacion të thjeshtuar mbi Administratën Tatimore, të drejtat dhe detyrimet e tyre ndaj kësaj të fundit si dhe çdo proces që lidhet me zbatueshmërinë e legjislacionit tatimor, duke përfshirë fillesat e një biznesi (regjistrimin e tij) jetën, ciklin e një biznesi dhe deri në procedurat për mbylljen e tij.

Më datë 26-27 Tetor 2017, në Pallatin e Kongreseve, Tiranë, do të organizohet për herë të parë eventi i ndërmjetësimit “Tirana Business Matching”.

Tirana Business Matching do të bëjë bashkë lider korporatash, politikë-bërës ekonomie, personalitete të huaja, ekspertë, përgjatë një programi intensiv dy ditor.

Temat kryesore ku do të fokusohet eventi do të jenë:

• Infrastruktura
• Turizmi
• Bujqësia dhe Agro-përpunimi
• Inovacioni &Teknologjia
• Energjia
• Tregje financiare

Sipërmarrës nga Emiratet e Bashkuara Arabe, Italia, Austria, Turqia, Kroacia, Kosova, Maqedonia si dhe shumë vende të tjera do prezantojnë mundësitë e tyre konkrete të bashkëpunimit me palën shqiptare.

Tirana Business Matching do të jetë një platformë lider në promovimin dhe krijimin e një mjedisi optimal, të lidhur ngushtë me strategjinë kombëtare, prioritetet dhe mundësitë e bashkëpunimit për të mundësuar B2B dhe marrëveshje me kompani shqiptare. Të gjithë pjesëmarrësit do të kenë mundësi të marrin pjesë në forumin e biznesit dhe në takime të dedikuara B2B me palët e përzgjedhura sipas një axhende të përshtatur posaçërisht për to. Ky event është i modeluar për të tërhequr llojin e duhur të investimeve të huaja direkte dhe partner të përshtatshëm, të cilët do të kontribuojnë në rritjen e konkurrueshmërisë së ekonomisë shqiptare.

Për më shumë informacion rreth eventit, si dhe procesin e regjistrimit mund të klikoni në linkun: https://www.b2match.eu/tiranabusinessmatching2017

Drejtoria e Përgjithshme sqaron tatimpaguesit se afati për të paguar një borxh tatimor sipas rasteve është:

• Në rastin e vetëdeklarimit brenda 10 ditëve nga data e vetëdeklarimit.
• Nëse borxhi nuk është apeluar bëhet brenda 30 ditësh nga data e marrjes së njoftim vlerësimit
• Brenda 30 ditëve nga data e marrjes së njoftim vlerësimit, vetëm detyrimin tatimor dhe kamatëvonesën lidhur me të, edhe në rastin kur tatimpaguesi ka apeluar borxhin tatimor.

Me plotësimin e afateve proceduriale të mësipërme, sistemi në mënyrë automatike ju dërgon në e-filing tuaj “Njoftim dhe kërkesë për pagimin e detyrimit tatimor”. Nëse brenda 10 ditësh nga data e marrjes së këtij njoftimi, tatimpaguesi vazhdon të mos paguajë borxhin e tij tatimor, ndaj tij fillojnë masat ligjore të mbledhjes me forcë të borxhit.

Masat e mbledhjes me forcë të borxhit tatimor, janë:

Hapi I-rë: Urdhër bllokimi i llogarive bankare, ku i kërkohet çdo banke ku tatimpaguesi ka llogaritë e tij të mbajë shumën e detyrimit të papaguar në rast mosarkëtimi të detyrimeve 10 ditë pas njoftimit të tij.
Hapi II-të: Barrë sigurie dhe/ose Barrë hipotekore mbi pasuritë 10 ditë pas lëshimit të urdhër bllokimit në rast se nuk është arritur arkëtimi i detyrimit.
Hapi III-të: Urdhër për sekuestrim të pasurive të luajtshme dhe të paluajtshme në rast se detyrimi nuk është arkëtuar brenda 30 ditëve nga data e vendosjes së barrës së sigurisë dhe/ose hipotekore.
Hapi IV-t: Konfiskimi i pasurisë nga Adminisitrata Tatimore në rast se detyrimi nuk është arkëtuar brenda 15 ditëve nga sekuestrimi i pasurisë.

Administrata Tatimore i dërgon gjithashtu administratës doganore një njoftim ku kërkohet bllokimi i aktivitetit doganor të tatimpaguesit deri në momentin e kryerjes së pagesës së detyrimit të papaguar.

Në rastet e moslikujdimit të plotë të detyrimit tatimor pas ndjekjes së hapave të mësipërme kalohet në nxjerrjen e njoftimit, i cili urdhëron palët e treta për pagesën e detyrimit tatimor.

Sipas të dhënave zyrtare nga Departementi i Politikës Monetare në Bankën e Shqipërisë, kredia për biznese shënoi rritje të moderuar gjatë tremujorit të dytë të vitit 2017, e ndikuar si nga rikuperimi i ngadaltë i kërkesës për kredi dhe oferta e ngurtë, ashtu edhe nga shlyerja e kredive me probleme. Përmirësimi i aktivitetit ekonomik ka ndikuar në shtimin e likuiditetit të bizneseve, në rikuperimin e ngadaltë të kërkesës për kredi nga ky segment, si dhe ka mundësuar shlyerjen e kredive. Kredia për biznese sipas monedhave është mbështetur nga kredia në lekë. Ndërkohë, sipas qëllimit të përdorimit është kredia për investime, që ka kontribuar pozitivisht. Normat e interesit për kreditë në lekë për bizneset kanë shënuar rënie në tremujorin e dytë të vitit. Bankat presin që standardet dhe kërkesa e kredisë për biznese të jetë e ngjashme edhe në tremujorin e tretë të vitit 2017.

Portofoli i kredisë për biznese në bilancin e bankave është tkurrur me 6 miliardë lekë në tremujorin e dytë të vitit 2017. Ky reduktim ka reflektuar rimëkëmbjen e ngadaltë të kredisë për këtë sektor, shlyerjen e kredive, si dhe ndikimin e lartë kontabël nga luhatjet e kursit të këmbimit. Kjo ecuri është reflektuar në uljen e peshës së kredisë së bizneseve ndaj totalit me 1.2 pp krahasuar me fundin e vitit 2016, për të arritur në 65.9%. Në rënie shfaqet edhe raporti i kredisë për biznese ndaj PBB-së në 24.5% përkundrejt 25.2%, që shënonte në dhjetor 2016.

Megjithatë, pastruar nga efekti i kursit të këmbimit, portofoli i kredisë për biznese shfaq një rritje tremujore me 2 miliardë lekë, më e lartë sesa një tremujor më parë dhe në linjë me sjelljen sezonale të kredisë. Ndërkohë, në terma mesatarë vjetorë, norma e rritjes shfaqet e ngadalësuar në rreth 2%, e ndikuar edhe nga rritja e fortë e këtij portofoli në të njëjtën periudhë të një viti më parë. Dobësia e kredisë së bizneseve ka reflektuar një rikuperim të ngadaltë të kërkesës për kredi nga bizneset, si dhe kushtet akoma të shtrënguara të kreditimit për biznesin e madh. Kredia për këto të fundit ka diktuar edhe trajektoren e rritjes së moderuar të kredisë për biznese, për shkak të peshës së madhe të këtij segmenti në portofolin e kredisë së bankave (prej 60.4%).

Rritja e kredisë për biznese është përcaktuar nga kreditimi në lekë, i cili, pavarësisht normave më të ngadalësuara se në tremujorin e parë, vijon të rritet me ritme të larta prej 8.4%. Zhvillimet tremujore tregojnë se rritja e portofolit të kredisë në lekë me 3.2 miliardë lekë nuk arriti të kompensojë tkurrjen e fortë, prej rreth 8.9 miliardë lekësh të kredisë në valutë, për të njëjtën periudhë. Tkurrja e lartë e këtij portofoli është ndikuar ndjeshëm nga mbiçmimi i fortë i lekut ndaj monedhave euro dhe usd, veçanërisht në muajt maj dhe qershor. Duke e rregulluar për këtë efekt, tkurrja e kredisë në valutë për biznese është rreth 0.5 miliardë lekë. Këto zhvillime janë reflektuar në rritjen e peshës së kredisë në lekë ndaj totalit të bizneseve në 38.5%, ose 3.4 pp më e lartë se muaji qershor 2016. Përgjatë vitit të fundit, portofoli i kredisë së bizneseve po shfaq një zhvendosje të shpejtë drejt monedhës vendase, nxitur edhe nga normat e ulëta të kredisë në lekë për këtë segment.

Sipas të dhënave zyrtare të INSTAT në Korrik 2017 eksportet e mallrave arritën vlerën 25 mld lekë, duke u rritur me 9,7 %, në krahasim me të njëjtën periudhë të një viti më parë dhe me 9,4 %, në krahasim me Qershor 2017. Importet e mallrave në Korrik 2017 arritën vlerën 55 mld lekë, duke u rritur me 9,2 %, në krahasim me një vit më parë dhe duke u ulur me 3,7 %, në krahasim me Qershor 2017. Deficiti tregtar i këtij muaji është 30 mld lekë, duke u rritur me 8,9 %, krahasuar me Korrik 2016 dhe duke u ulur me12,3 %, në krahasim me Qershor 2017.

Rritja vjetore e eksporteve prej 9,7 %, këtë muaj është ndikuar kryesisht nga grupet: “tekstile dhe këpucë” me +5,6 pikë përqindje, “materiale ndërtimi dhe metale” me +3,6 pikë përqindje, “ushqime, pije, duhan” me +3,3 pikë përqindje. Grupi që ka ndikuar negativisht në ndryshimin vjetor të eksporteve, është: “minerale, lëndë djegëse, energji elektrike” me -5,9 pikë përqindje

Eksportet, gjatë këtij shtatë mujori janë rritur me 12,9 %, krahasuar me një vit më parë. Grupet që kanë ndikuar pozitivisht në rritjen vjetore të eksporteve, janë: “materiale ndërtimi dhe metale” me +5,0 pikë përqindje, “tekstile dhe këpucë” me +3,9 pikë përqindje, “ushqim, pije, duhan” me +1,7 pikë përqindje. Në ndryshimin vjetor të eksporteve, nuk ka ndikuar negativisht asnjë grup.

Sipas të dhënave zyrtare të INSTAT, Indeksi i Çmimeve të Konsumit në muajin Korrik 2017, arriti 102,3 kundrejt muajit Dhjetor 2015. Në Korrik 2017 ndryshimi vjetor i Indeksit të Çmimeve të Konsumit është 2,0 %. Një vit më parë ky ndryshim ishte 1,9 %.

Rritja vjetore e çmimeve në muajin Korrik është ndikuar kryesisht nga grupi “ushqime dhe pije joalkoolike” me +1,71 pikë përqindje. Çmimet e grupit “qira, ujë, lëndë djegëse dhe energji” kanë kontribuar me +0,22 pikë përqindje. Çmimet e grupit “mallra dhe shërbime të ndryshme” kanë kontribuar me +0,17 pikë përqindje. Çmimet e grupeve “pije alkoolike dhe duhan” dhe “shërbimi arsimor” kanë kontribuar me +0,03 pikë përqindje secili. Çmimet e grupit “transport” dhe “komunikimi” kanë kontribuar me +0,02 pikë përqindje secili. Çmimet e grupeve “veshje dhe këpucë” dhe “mobilje, pajisje shtëpie dhe mirëmbajtje” kanë kontribuar me -0,07 pikë përqindje secili. Çmimet e grupit “argëtim e kulturë” kanë kontribuar me -0,03 pikë përqindje.

Në zbatim të ligjit “Për Pagesën dhe fshirjen e pjesshme të detyrimeve tatimore, doganore, si dhe procedura e heqjes nga qarkullimi të mjeteve të transportit” dhe Udhëzimit të Ministrisë së Financave në zbatim të tij, Drejtoria e Përgjithshme e Tatimeve, pasi përmbylli me sukses procesin e fshirjes së detyrimeve për mosdeklarim në afat, implementoi fazën e parë: Fshirja automatike e detyrimeve të papaguar të interesave për pagesë të vonuar si edhe çdo penaliteti për të cilin nuk ka principal të papaguar, për periudhat mujore deri më 1012 (Dhjetor 2010, përfshirë) dhe periudhat vjetore deri më 10-A (përfshirë).

Gjatë ditës së djeshme nga fshirja automatike e këtyre detyrimeve, për periudhat e përcaktuara sipas nenit 5 të ligjit 33/2017, janë ekzekutuar 50 430 raste ku kanë përfituar në total 11 577 tatimpagues. Nga fshirja automatike kanë përfituar të gjithë kategoritë e tatimpaguesve që kanë patur detyrime të tilla, pavarësisht nga statusi i tyre aktual. Llojet e detyrimeve që janë fshirë nga sistemi elektronik për pagesë të vonuar janë:

• Interesa për pagesë të vonuar
• Gjoba për pagesë të vonuar
• Dënime administrative

Të gjithë tatimpaguesit që kanë përfituar do të gjejnë në llogarinë e tyre elektronike njoftimin përkatës. Procesi i fshirjes automatike do të vijojë hap pas hapi me çdo zë që parashikon legjislacioni.

Drejtoria e Përgjithshme e Tatimeve kujton se tatimpaguesit duhet të konsultohen me legjislacionin lidhur me detyrimet që përjashtohen nga falja. Informacioni i plotë i ligjit dhe udhëzimit të Ministrisë së Financave gjendet i publikuar në faqen zyrtare të tatimeve www.tatime.gov.al në rubrikën “Legjislacioni”