Kreu

“Qeveria të konsultohet për listën e produkteve të shportës”

Shqetësimet e prodhuesve për Paketën Fiskale 2027 u ngritën në panelin e emisionit “Ekopol” në TV SCAN.

Në diskutimin e drejtuar nga gazetarja Aurora Sulçe, sekretari i përgjithshëm i Shoqatës “Bashkimi i Prodhuesve Shqiptarë”, Arben Shkodra, ia parashtroi ato ministrit të Financave, Petrit Malaj.

Z.Shkodra theksoi se gjatë hartimit të paketës mungoi dialogu me prodhuesit. Ai kërkoi konsultim për listën e produkteve që do të përfitojnë nga TVSH-ja 6% dhe propozoi që rritja e tatimit mbi dividentin nga 8% në 15% të zbatohet me faza, duke marrë parasysh ndikimin te investimet.

Në mbyllje, z.Shkodra ngriti shqetësimin për gatishmërinë e ndërmarrjeve shqiptare për integrimin në BE. Sipas tij, sot vetëm 5% e ndërmarrjeve janë gati.

Ai vlerësoi se duhen të paktën 200 milionë euro në vit në mbështetje nga shteti, për tre vitet e ardhshme, që ndërmarrjet të përshtaten me kërkesat e BE-së dhe të përballojnë konkurrencën në tregun europian.

Konkurrueshmëria e ekonomisë shqiptare, sfidat dhe rreziqet

Shoqata “Bashkimi i Prodhuesve Shqiptarë” organizoi, në kuadër të Panairit Ndërkombëtar të Tiranës, një tryezë diskutimi me përfaqësues të biznesit, shoqatave dhe ekspertë të ekonomisë, për të analizuar sfidat që ndikojnë në konkurrueshmërinë e ekonomisë shqiptare dhe perspektivën e zhvillimit të saj.

Në qendër të diskutimeve ishte paketa e re fiskale dhe ndikimi i saj i mundshëm në kostot e prodhimit, çmimet, aktivitetin e sipërmarrjeve dhe pozicionin konkurrues të Shqipërisë në rajon.

Pjesëmarrësit shprehën shqetësime për barrën fiskale, mungesën e transparencës dhe dialogun e pamjaftueshëm ndërmjet qeverisë dhe biznesit. U theksua nevoja për politika fiskale të mirëstudiuara, të parashikueshme dhe të drejta, si dhe për përfshirjen e sipërmarrjes në proceset vendimmarrëse.

Forcimi i konkurrueshmërisë kërkon një dialog të strukturuar dhe politika ekonomike që mbështesin prodhimin vendas, investimet dhe zhvillimin e qëndrueshëm të biznesit.

Mbledhje e jashtëzakonshme Asambleje për paketën fiskale

Paketa fiskale 2027 në qendër të mbledhjes së jashtëzakonshme të Asamblesë së Bashkimit të Prodhuesve Shqiptarë

Prodhuesit shprehën kundërshtimin ndaj paketës së re fiskale, të cilën e cilësuan të pakonsultuar, dhe ngritën shqetësime për ndikimin e saj mbi likuiditetin, investimet dhe konkurrueshmërinë e industrisë vendase.

Në diskutime u theksua se rritja e tatimit mbi dividendin në 15% kufizon fondet e aksionarëve për investime, ndërsa ulja e pragut të regjistrimit në TVSH nuk i jep zgjidhje informalitetit. Përfaqësuesit e industrisë së duhanit paralajmëruan se rritja e akcizës rrezikon qëndrueshmërinë e sektorit.

Sipërmarrësit evidentuan gjithashtu kostot e larta të prodhimit dhe energjisë elektrike, barrën e akcizave, zhvlerësimin e euros dhe mungesën e stafit të kualifikuar.

Prodhuesit kërkuan TVSH 6% edhe për lëndët e para të produkteve të shportës, zbatim me faza të ndryshimeve fiskale dhe kohë të mjaftueshme për përshtatje. Konsultimi dhe dialogu me sipërmarrjen duhet t’i paraprijnë çdo vendimmarrjeje me karakter ekonomik.

Bashkimi i Prodhuesve Shqiptarë kundërshton ndryshimet fiskale

Paketa e re fiskale pritet të rrisë barrën tatimore për bizneset, duke lënë më pak fonde për investime dhe duke shtuar presionin mbi çmimet.

Parashikohet rritja e tatimit mbi fitimin nga 15% në 17% dhe e tatimit mbi dividendin nga 8% në 15%. Norma e përgjithshme e TVSH-së pritet të rritet nga 20% në 21%, ndërsa norma e reduktuar për turizmin nga 6% në 10%.

Ulja e pragut të regjistrimit të detyrueshëm në TVSH nga 10 në 5 milionë lekë qarkullim vjetor do të përfshinte më shumë biznese të vogla në këtë skemë, duke u shtuar detyrimet për deklarim dhe administrim.

Shoqata “Bashkimi i Prodhuesve Shqiptarë” kundërshton fuqimisht çdo ndryshim në paketën fiskale që hartohet pa konsultim real dhe transparent me komunitetin e biznesit.

Ndryshimet që prekin sipërmarrjen kërkojnë dialog paraprak, vlerësim të ndikimit dhe kohë të mjaftueshme për përshtatje.

Zëri i sipërmarrjes duhet të dëgjohet përpara çdo vendimmarrjeje me karakter ekonomik.

“Inspektimet të jenë këshilluese deri në vitin 2027”

Inspektorati i Përgjithshëm zhvilloi një tryezë dialogu me shoqatat dhe dhomat përfaqësuese të biznesit, në kuadër të reformimit të sistemit të inspektimit dhe ndërtimit të një raporti të ri me sipërmarrjen.

Në fjalën e tij, Sekretari i Përgjithshëm i Shoqatës “Bashkimi i Prodhuesve Shqiptarë”, theksoi se sfida kryesore është që kjo frymë reformuese të reflektohet edhe te inspektorët në terren, aty ku biznesi përballet drejtpërdrejt me kontrollin dhe zbatimin e ligjit.

Z. Shkodra rikujtoi se përafrimi me legjislacionin e Bashkimit Europian do të sjellë kërkesa më të ndërlikuara, detyrime të reja dhe kosto shtesë për sipërmarrjen.

Në këtë proces, paralajmëroi ai, ekziston rreziku që derregullimi të pasohet nga mbirregullimi, duke shtuar barrën mbi bizneset në një periudhë kur ato duhet të përshtaten me standarde të reja.

Z. Shkodra propozoi që deri në vitin 2027 inspektimet të kenë kryesisht karakter këshillues: të evidentojnë mangësitë, të orientojnë biznesin dhe t’i japin kohën e nevojshme për t’u përshtatur përpara aplikimit të sanksioneve.

CIPE asiston ristrukturimin e Bashkimit të Prodhuesve Shqiptarë

Një dekadë e re kërkon një qasje të re!

Bashkimi i Prodhuesve Shqiptarë ka nisur procesin e transformimit dhe ristrukturimit të Shoqatës përmes një partneriteti me Center for International Private Enterprise (CIPE), e cila do të asistojë në forcimin e kapaciteteve organizative, fuqizimin e rolit advokues dhe përfaqësimin më efektiv të çështjeve prioritare të industrisë prodhuese.

Në kuadër të këtij bashkëpunimi, përfaqësues të Shoqatës morën pjesë në workshopin dyditor të organizuar nga CIPE, së bashku me organizata të biznesit nga vendet e Ballkanit Perëndimor.

Workshopi krijoi një hapësirë të vlefshme për shkëmbimin e përvojave, ndërtimin e partneriteteve të reja dhe diskutimin e praktikave që forcojnë rolin, qëndrueshmërinë dhe efektivitetin e organizatave të biznesit.

Ky partneritet shënon fillimin e një etape të re për Bashkimin e Prodhuesve Shqiptarë, me synimin për të ndërtuar një organizatë edhe më të fortë, më moderne dhe më efektive në përfaqësimin e interesave të prodhuesve shqiptarë.

Arsimi profesional, nis partneriteti me Dhomën Zejtare të Dortmundit

Një industri më konkurruese nis nga një fuqi punëtore më e kualifikuar.

Me këtë vizion, Dhoma Zejtare e Dortmundit, Bashkimi i Prodhuesve Shqiptarë dhe Shkolla Profesionale “Karl Gega” po ndërtojnë një partneritet strategjik për forcimin e arsimit profesional dhe zhvillimin e kapitalit njerëzor në Shqipëri.

Gjatë workshop-it të përbashkët për gjetjen e fakteve të Projektit Federal “Partneriteti për Arsim Profesional në Shqipëri”, ekspertët e Dhomës Zejtare të Dortmundit, përfaqësuesit e Bashkimit të Prodhuesve Shqiptarë, të Shkollës Profesionale “Karl Gega” dhe partnerët institucionalë diskutuan objektivat e projektit, modulet e trajnimit dhe modelin e bashkëpunimit mes biznesit, arsimit profesional dhe institucioneve.

Projekti synon zhvillimin e programeve moderne të formimit profesional, të orientuara drejt praktikës dhe kërkesave të tregut të punës, forcimin e bashkëpunimit mes ndërmarrjeve dhe shkollave profesionale, si edhe përmirësimin e cilësisë së arsimit profesional sipas standardeve ndërkombëtare.

Projekti mbështetet nga Ministria Federale për Bashkëpunim Ekonomik dhe Zhvillim e Gjermanisë (BMZ) dhe shënon një hap konkret drejt ndërtimit të një fuqie punëtore që i përgjigjet nevojave të industrisë shqiptare.

Mblidhet Asambleja e Përgjithshme, prezantohet vizioni për dekadën e re

Mbledhja e Asamblesë së Përgjithshme e Bashkimit të Prodhuesve Shqiptarë shënoi një etapë të rëndësishme për të ardhmen e Shoqatës dhe të industrisë prodhuese në vend.

Në fokus të diskutimeve ishin ristrukturimi i Shoqatës, vizioni për 10-vjetorin dhe një qasje e re në përfaqësimin, komunikimin dhe mbështetjen e anëtarëve të saj.

Gjatë Asamblesë, prodhuesit ngritën problematikat kryesore që ndikojnë në zhvillimin e industrisë, duke theksuar nevojën për më shumë konsultim publik, drejtësi fiskale, lehtësim të barrës administrative, ulje të kostove të prodhimit, zhvillim të kapitalit njerëzor, përmbushje të standardeve të Bashkimit Europian, si dhe adresim të çështjeve mjedisore.

Asambleja konfirmoi një drejtim të qartë: një Shoqatë më pranë anëtarëve dhe më e angazhuar në ndërtimin e një dialogu të qëndrueshëm me institucionet për çështjet që prekin industrinë prodhuese.