Në konsultim publik projektvendimi për ambalazhet dhe mbetjet e tyre.
Ai parashikon kërkesa për riciklueshmërinë, etiketimin dhe gjurmueshmërinë, si dhe detyrime për financimin e menaxhimit të mbetjeve.
Prek prodhuesit, importuesit dhe shpërndarësit, sipas rolit të tyre.
Afati për komente: 20 nëntor 2026.
Njihuni me propozimet dhe jepni mendimin tuaj në Regjistrin Elektronik për Njoftimet dhe Konsultimet Publike
Projektligji “Për tregtimin e produkteve të ndërtimit” synon të garantojë produkte ndërtimi të sigurta, me performancë të dokumentuar dhe të gjurmueshme, duke përafruar pjesërisht rregullat shqiptare me ato të BE-së. Ai përfshin edhe produktet e përdorura, pjesët kyçe dhe produktet e printuara në 3D.
Detyrimet kryesore
Sipas specifikimeve dhe sistemit të zbatueshëm për produktin, prodhuesit duhet:
Jo çdo produkt kërkon laborator ose organ certifikimi. Ndërhyrja e palës së tretë varet nga sistemi përkatës; në sistemin 4, vlerësimin dhe kontrollin i kryen prodhuesi.
Markimi CE
Deri në anëtarësimin në BE, CE nuk është përgjithësisht i detyrueshëm sipas projektligjit, përveçse kur një marrëveshje Shqipëri–BE parashikon ndryshe. Kur një produkt shqiptar tregtohet me CE dhe kërkohet palë e tretë, procedurat kryhen nga organizma evropianë të notifikuar ose degët e tyre të regjistruara në Shqipëri.
Kjo nuk heq detyrimet e tjera për dokumentacionin, performancën dhe sigurinë, as kërkesat evropiane për eksportet në BE.
Kërkesat mjedisore dhe digjitale
Parashikohet deklarimi i ndikimit mjedisor gjatë ciklit jetësor, përfshirë paketimin, me përllogaritje përmes programit që ministria do të ofrojë pa pagesë. Treguesit zbatohen me faza: ndikimet klimatike nga 1 dhjetori 2027, grupi i dytë nga 9 janari 2030 dhe grupi i tretë nga 9 janari 2032.
Pasaporta digjitale do të përmbledhë dokumentet dhe të dhënat e produktit. Detyrimet për të fillojnë kur Shqipëria fiton akses në sistemin evropian ose anëtarësohet në BE, cilado ngjarje të ndodhë e para.
Lehtësimet dhe mundësitë
Projektligji parashikon përdorimin e rezultateve ekzistuese të testimit në kushte të caktuara, procedura të thjeshtuara për mikro-ndërmarrjet dhe përjashtime të kufizuara për prodhime individuale, me porosi ose për trashëgiminë kulturore. Prodhuesit mund të kërkojnë të dhëna nga furnitorët dhe informacion falas nga pika e kontaktit.
Dokumentimi i cilësisë dhe performancës mjedisore mund të forcojë besueshmërinë e produkteve dhe mundësitë në prokurimin e gjelbër ose skemat e stimujve, pa garantuar subvencione apo kontrata.
Afatet dhe sanksionet
Zbatimi i përgjithshëm parashikohet një vit pas hyrjes në fuqi, me afate të posaçme për disa kërkesa. Deri më 8 janar 2040 lejohet edhe rruga kalimtare e tregtimit sipas standardeve, dokumenteve dhe deklaratës së performancës përkatëse; kjo nuk përbën përjashtim të përgjithshëm nga detyrimet.
Për shkelje të caktuara parashikohet gjobë 2% e xhiros vjetore të vitit pararendës, jo më pak se 200.000 lekë; për të tjera, 150.000, 100.000 ose 50.000 lekë. Përsëritja sipas kushteve të parashikuara rrit gjobën me 50%. Mund të vendosen edhe ndalim tregtimi, tërheqje produktesh dhe rimbursim kostosh kontrolli.
Prodhuesit duhet të përgatitin dosjet teknike, kontrollet e prodhimit, gjurmueshmërinë, etiketat dhe të dhënat mjedisore, duke planifikuar investimet sipas kërkesave dhe afateve për produktin konkret.
Projektligjin e plotë dhe relacionin e tij mund ta gjeni në faqen e konsultimeve publike, aty mund te lini komente dhe sugjerime deri në datën 29 tetor 2026.
Etiketimi, siguria ushqimore dhe zbatimi i legjislacionit në praktikë ishin në qendër të takimit të ministres së Ekonomisë dhe Inovacionit, Delina Ibrahimaj, dhe drejtores së AKU-së, Blerina Gjylameti, me prodhuesit e sektorit ushqimor.
Diskutimi u përqendrua te nevoja për rregulla të qarta, procedura transparente dhe informacion të saktë për konsumatorin, me vëmendje të veçantë te lexueshmëria e etiketave, data e prodhimit, afati i përdorimit dhe skadenca.
Prodhuesit theksuan se siguria ushqimore është në fokus të aktivitetit të tyre dhe se investimi në teknologji dhe respektimi i standardeve mbeten thelbësore.
Arben Shkodra, Sekretar i Përgjithshëm i Shoqatës “Bashkimi i Prodhuesve Shqiptarë”, vuri theksin te rëndësia që bizneset të njohin në kohë legjislacionin dhe rregulloret e reja të BE-së, pasi kërkesat që po hyjnë në fuqi mund të ndikojnë drejtpërdrejt në proceset dhe modelin e tyre të biznesit. Z. Shkodra nënvizoi gjithashtu nevojën që vetë prodhuesit të kërkojnë dhe të mbështesin transparencën.
Takimi konfirmoi rëndësinë e dialogut të drejtpërdrejtë mes institucioneve dhe industrisë për të adresuar problemet konkrete, për të garantuar standarde të qarta dhe për të forcuar sigurinë ushqimore.
Kodi Doganor pritet t’i nënshtrohet një rishikimi të gjerë, që prek procedurat e bizneseve në dogana, ankimet, garancitë, kamatëvonesat, kursin e këmbimit, sanksionet dhe digjitalizimin e shërbimeve.
Projektligji për ndryshimin e ligjit nr. 102/2014, i hedhur për konsultim publik, synon përafrimin e mëtejshëm me Kodin Doganor të Bashkimit Evropian.
Një nga ndryshimet kryesore lidhet me kamatëvonesat për detyrimet doganore të papaguara. Shuma e kamatëvonesës nuk do të mund të tejkalojë vetë vlerën e detyrimit të importit ose eksportit mbi të cilin llogaritet.
Ndryshime parashikohen edhe në procedurën e ankimit. Subjektet do të mund të kundërshtojnë vendimet e Doganave që i prekin drejtpërdrejt. Kur Drejtoria e Përgjithshme e Doganave është organi më i lartë administrativ, ankimi bëhet brenda 15 ditëve, ndërsa vendimi duhet të merret brenda 30 ditëve.
Për garancitë doganore, projektligji parashikon që Doganat të mund të mos kërkojnë depozitimin e tyre për mallra tregtare me vlerë deri në ekuivalentin e 1,000 eurove ose deri në 1,000 kg peshë neto, si edhe për mallrat jotregtare.
Ndryshon edhe mënyra e përcaktimit të kursit të këmbimit për llogaritjen e vlerës doganore dhe detyrimeve. Referencë do të jetë kursi i Bankës së Shqipërisë i publikuar të mërkurën e parafundit të çdo muaji.
Rishikimi prek edhe sanksionet doganore, të cilat duhet të jenë efektive, proporcionale dhe dekurajuese. Masat mund të përfshijnë gjoba, por edhe pezullimin, ndryshimin ose revokimin e autorizimeve.
Një pjesë e rëndësishme e reformës është digjitalizimi i Doganave, përmes krijimit të “dritares së vetme kombëtare për doganat” dhe zgjerimit të përdorimit të sistemeve elektronike për shkëmbimin dhe ruajtjen e informacionit. Projektligji zgjeron gjithashtu kuadrin për Operatorët Ekonomikë të Autorizuar (AEO), duke hapur mundësinë e njohjes së statusit dhe përfitimeve edhe për operatorë jashtë territorit doganor shqiptar, mbi bazën e reciprocitetit dhe marrëveshjeve përkatëse.
Ndryshon ligji i inspektimeve! Me miratimin e ndryshimeve në ligjin “Për inspektimin në Republikën e Shqipërisë”, synohet më shumë transparencë, më pak burokraci dhe shërbime më efikase për biznesin.
Ndryshimet parashikojnë rritjen e digjitalizimit, uljen e komunikimit fizik mes administratës dhe biznesit, si edhe përzgjedhjen e subjekteve për inspektim në bazë risku nga sistemi dhe jo nga inspektori.
Ligji lidhet ngushtësisht me procesin e integrimit europian dhe prek drejtpërdrejt klimën e të bërit biznes në Shqipëri.
Një kërkesë e artikuluar prej vitesh nga Shoqata “Bashkimi i Prodhuesve Shqiptarë” për krijimin e një legjislacioni të posaçëm për markën shqiptare po merr formë konkrete nga institucionet.
Këtë të hënë, nën kujdesin e Ministrisë së Ekonomisë dhe Inovacionit, u zhvillua dëgjesa e parë me bizneset për projektligjin “Made in Albania”, ku prodhuesit ngritën shqetësimet dhe pritshmëritë e tyre për nismën.
Drejtues të kompanive kërkuan që ligji të garantojë rritjen e konkurrueshmërisë së produkteve shqiptare, forcimin e besimit të konsumatorëve vendas dhe të huaj, si edhe promovim më të gjerë të prodhimeve “Made in Albania” në tregjet ndërkombëtare.
Nevojën për lehtësi dhe mbështetje më të madhe nga qeveria e nënvizoi edhe Sekretari i Përgjithshëm i Shoqatës “Bashkimi i Prodhuesve Shqiptarë”, Arben Shkodra, i cili paralajmëroi se, nëse nuk merren masat e duhura në kohë, Shqipëria rrezikon deindustrializimin.
Nga ana tjetër, zëvendësministri i Ekonomisë dhe Inovacionit, Enkelejd Musabelliu, garantoi se shqetësimet e prodhuesve do të adresohen dhe se do të organizohen dëgjesa të tjera, në mënyrë që ligji “Made in Albania” të reflektojë nevojat reale të biznesit.
Në vitin 2016, një grup shoqërish prodhuese më në zë në territorin e Shqipërisë iniciuan themelimin e një entiteti të vetëm për t’i ardhur në ndihmë industrisë prodhuese vendase.
