Lajme

Paketa fiskale shton presionin mbi prodhimin vendas dhe i krijon atij disavantazhe përballë importeve, paralajmëroi Sekretari i Përgjithshëm i shoqatës “Bashkimi i Prodhuesve Shqiptarë” në një intervistë për Top Neës. Z. Shkodra e cilësoi paketën “absurde dhe paradoksale” dhe kritikoi përshpejtimin e procesit të miratimit të saj.

Ai ritheksoi propozimin për heqjen e fashave të deklarimit të TVSH-së, të shoqëruar me rimbursim automatik për kategori të caktuara biznesesh.

Uljen e parashikuar të TVSH-së për produktet e shportës e vlerësoi pozitivisht, por ngriti pikëpyetje nëse ajo do të sjellë çmime më të ulëta dhe si do të trajtohen stoqet e blera me TVSH 20%.

Kostot e inputeve, rritja e pritshme e kostove të energjisë dhe karburantit, konkurrenca nga importet dhe informaliteti ishin shqetësimet kryesore të ngritura. Z. Shkodra theksoi se biznesi ka nevojë për mbështetje për të përballuar sfidat e integrimit në tregun e BE-së, ndërsa qeveria, përmes kësaj pakete, po i krijon disavantazhe të reja.

Shoqata “Bashkimi i Prodhuesve Shqiptarë” po ndjek me vëmendje dhe shqetësim zhvillimet që kanë shoqëruar protestat e ditëve të fundit në Tiranë.

Shoqata njeh dhe mbështet të drejtën e çdo qytetari për të shprehur lirisht qëndrimet dhe kërkesat e tij përmes protestës paqësore. Kjo është një e drejtë themelore e një shoqërie demokratike, e cila duhet të respektohet dhe të garantohet, në përputhje me parimet kushtetuese dhe standardet evropiane.

Në të njëjtën kohë, ushtrimi i kësaj të drejte nuk mund të justifikojë dhunën, dëmtimin e pronës private apo rrezikimin e sigurisë së punonjësve të saj.

Sipërmarrja dhe veprimtaria e saj ekonomike nuk duhet të bëhen objekt i akteve të vandalizmit, shkatërrimit, dëmtimit dhe vjedhjes.

Shoqata “Bashkimi i Prodhuesve Shqiptarë” u kërkon institucioneve përgjegjëse të mbrojnë mundin dhe djersën e sipërmarrësve shqiptarë.

Rritja e inflacionit në ekonomitë kryesore të eurozonës paralajmëron presion të shtuar për prodhuesit shqiptarë.

Sipas analizës së Reuters të 30 shtatorit 2026, inflacioni u përshpejtua në shtator në disa prej ekonomive kryesore të eurozonës: në Gjermani arriti 3,3%, nga 2,9% në gusht, në Francë 3,4%, nga 2,6%, dhe në Itali 4,1%, nga 3,2%. Reuters e lidh përshpejtimin kryesisht me shtrenjtimin e energjisë.

Në Shqipëri, inflacioni vjetor ishte 3,2% në gusht, kundrejt 3,4% në korrik (të dhënat shqiptare për shtatorin ende nuk janë publikuar). Kjo tregon ngadalësim të ritmit ndaj muajit paraardhës, por jo ulje të nivelit të çmimeve.

Për prodhuesit shqiptarë, shqetësimi kryesor është rritja e mundshme e kostove në një treg që mund të përballojë më vështirë çmime më të larta. Shtrenjtimi i energjisë mund të transmetohet te materialet dhe transporti i importuar, ndërsa presioni mbi buxhetet e klientëve evropianë mund të frenojë porositë.

Më të ekspozuara janë ndërmarrjet që varen nga energjia dhe inputet e importuara, eksportojnë në eurozonë dhe kanë kontrata shitjeje me çmime fikse.

“Shqipëria rrezikon të hyjë në tregun e përbashkët europian pa një model të qartë ekonomik dhe pa përcaktuar sektorët që do të udhëheqin zhvillimin e vendit.”

Në një intervistë për emisionin “A2 Business” në A2 CNN, me gazetaren Aurora Sulçe, Sekretari i Përgjithshëm i Shoqatës “Bashkimi i Prodhuesve Shqiptarë”, Arben Shkodra, theksoi nevojën për hartimin e një strategjie kombëtare për konkurrueshmërinë, e cila do të mund të orientojë biznesin shqiptar në procesin e integrimit europian.

Sipas tij, pragmatizmi, aftësia për t’u përshtatur dhe shpirti sipërmarrës janë ndër pikat e forta të biznesit shqiptar. Megjithatë, modernizimi i mënyrës së të bërit biznes, forcimi i bashkëpunimit dhe mbështetja e industrisë prodhuese janë të domosdoshme.

Z. Shkodra nënvizoi se, pavarësisht qëndrueshmërisë dhe aftësisë për t’u përshtatur që ka dëshmuar ndër vite, biznesi prodhues nuk e ka pasur vëmendjen dhe mbështetjen e shtetit.