Statistika

Instituti i Statistikës, bën të ditur se gjatë vitit 2016, numri i gjedhëve në vend shënoi 492.393 krerë, ose 2,3 % më i ulët në krahasim me vitin 2015. Ndërsa u rrit me 2,8% për të njëjtën periudhë, numri i krerëve të të leshtave (dele, dhi).

Sipas INSTAT, në ndaj totalit të tufës së gjedhit dominojnë lopët e qumështit me 72 %. Numri i të leshtave shënoi 1.971.933 krerë .

Kategoria kryesore e të leshtave janë delet e qumështit me 72,4 % ndaj totalit të tufës. Qarqet ku është më i përqendruar mbarështimi i të leshtave është Vlora me 17,3 %, Gjirokastra dhe Fieri me 15 %. Lezha është qarku i cili ka numrin më të vogël të të leshtave, me 1,7 % ndaj totalit të numrit të krerëve në të gjithë vendin.

INSTAT bën të ditur se, në vitin 2016, numri i dhive rezultoi 940.806 krerë, me një rritje vjetore 0,9 %, në krahasim me vitin 2015. Kategoria kryesore janë dhitë e qumështit, me 76 % ndaj totalit të tufës.

Qarqet ku është më i përqëndruar mbarështimi i tyre janë Gjirokastra dhe Elbasani me 15 %, ndërsa Durrësi është qarku i cili ka numrin më të vogël të të dhirtave me 2,3 % ndaj totalit. Në vitin 2016 numri i krerëve të derrave ka qenë 181.024 krerë, duke shënuar një rritje vjetore me 5,6 % në krahasim me vitin 2015. Përqëndrimi më madh i numrit të krerëve është në Lezhë me 36,2 % dhe Shkodër me 27,7 % ndaj totalit të gjithë krerëve.

Qarqet me numrin më të vogël përfaqësues të derrave janë: Vlora dhe Elbasani me 3 %, ndërsa Gjirokastra është qarku më pak përfaqësues me 0,7 %, ndaj totalit të krerëve të derrave në të gjithë vendin.

Në 2016, prodhimi i qumështit është rreth 1.2 milion ton, duke rritur me 1,2 %, në krahasim me vitin 2015. Prodhimi i mishit peshë e gjallë është 160 mijë ton, duke u rritur me 1,27 %, në krahasim me vitin 2015.

Sipas të dhënave zyrtare të INSTAT, në tremujorin e dytë të vitit 2017, Indeksi i çmimeve të prodhimit arriti 101, 4 kundrejt vitit 2010. Indeksi i çmimeve të prodhimit u rrit përkatësisht me 1,6 %, në krahasim me tremujorin e dytë të vitit 2016 dhe u ul me 0,9 %, në krahasim me tremujorin e parë të vitit 2017.

Në tremujorin e dytë 2017 ndryshimi vjetor i Indeksit të çmimeve të prodhimit është 1,6 %. Rritjen më të lartë e kanë shënuar çmimet e prodhimit në seksionin “ industri nxjerrëse” me 8,2 %. Brenda kësaj industrie vihet re rritja e çmimeve të prodhimit të produkteve në nxjerrjen e naftës bruto dhe gazit natyror me 12,0 %.

Referuar të njëjtës periudhë krahasimi, çmimet e prodhimit në aktivitetet e industrisë përpunuese kanë shënuar rritje me 1,2 %. Brenda kësaj industrie vihet re rritja e çmimeve të prodhimit të produkteve në aktivitetin e metalurgjisë me 5,3 %, prodhimi i produkteve kimike me 5,1 %, konfeksionimi i veshjeve me 0,6 %.

Krahasuar me tremujorin e dytë të vitit 2016, çmimet e prodhimit të produkteve vendase shënuan rritje me 1,9 %.

Çmimet e prodhimit të produkteve për eksport kanë shënuar rritje me 3,3 %, krahasuar me të njëjtën periudhë të vitit të mëparshëm.

Në tremujorin e dytë 2017 ndryshimi tremujor i indeksit është 0,9 %. Çmimet e Prodhimit në seksionin ”industri nxjerrëse” shënuan ulje me 4,6 %, krahasuar me tremujorin e parë 2017. Uljen më të lartë e shënuan çmimet e prodhimit në aktivitetin “nxjerrja e naftës bruto dhe gazit natyror” me 6,5 %. Çmimet e prodhimit në seksionin “industria përpunuese” kanë shënuar ulje me 0,3 %, krahasuar me tremujorin e mëparshëm. Brenda kësaj industrie vihet re ulje e çmimeve të prodhimit të produkteve në aktivitetet: konfeksionimi i veshjeve me 0,4 %, prodhimi i produkteve ushqimore me 0,1 %, prodhimi i produkteve metalike të fabrikuara me 1,4%.

Indeksi i Çmimeve të Prodhimit për produktet vendase arriti 101,2 kundrejt vitit 2010, duke shënuar një ulje me 0,5 %, krahasuar me tremujorin e parë 2017. Vlen të përmendet ulja e çmimeve të prodhimit të produkteve në seksionet; “industri nxjerrëse” me 3,4 % dhe “industri përpunuese” me 0,3 %.

Indeksi i Çmimeve të Eksportit arriti 104,6 % duke shënuar ulje me 1,4 %, krahasuar me tremujorin e mëparshëm. Çmimet e prodhimit të produkteve në seksionet: “industri nxjerrëse” dhe “industri përpunuese” kanë shënuar ulje përkatësisht me 5,4% dhe 0,3%.