Njoftime

Drejtoria e Përgjithshme e Tatimeve në një njoftim zyrtar të saj, ve në dijeni të gjithë qytetarët se në çdo blerje me para në dorë, duhet të kërkojnë domosdoshmërisht nga shitësi apo ofruesi i shërbimit, kuponin tatimor.

Kuponi tatimor që i jepet një blerësi apo një klienti, përmban të dhënat e mëposhtme:

• Emrin, adresën e tatimpaguesit;
• NIPT-in;
• Emrin, sasinë, çmimin dhe vlerën e cdo artikulli /ose shërbimi;
• Vlerën totale  të mallrave apo shërbimeve të marra;
• Mënyrën e pagesës (cash, çek, kartë krediti etj.);
• Shumën e TVSH-së, sipas shkallës tatimore;

Në pjesën e fundit të kuponit tatimor ndër të tjera paraqitet:

• Numri i identifikimit të pajisjes fiskale;
• Data dhe ora e lëshimit të kuponit;
• Numri i kuponit
• Logo fiskale, që është shenja identifikuese, që vendoset në çdo kupon tatimor, në fund dhe e pozicionuar në qendër të tij.

Çdo kupon i lëshuar jo sipas kësaj forme, është i pavlefshëm dhe i dënueshëm administrativisht nga ligji, me gjobë në masën 50 000 (pesëdhjetë mijë) lekë.

Administrata tatimore sjell në vëmendje këto elementë, që ju të mos bini pre e lëshimit të një kuponi jotatimor nga pajisje fiskale jo të autorizuara. Të tillë kupona janë abuzivë dhe vlejnë vetëm për përfitime abuzive në dëm të interesit tuaj dhe shoqërisë në tërësi.

DPT ju inkurajon të denonconi çdo rast duke telefonuar në numrin pa pagesë 0800 14 14 ose duke na dërguar foto e video në Whatsapp dhe Viber në numrin 0697073733.

Afati i fundit i dorëzimit të bilanceve vjetore të vitit 2016 është data 31 korrik 2017.

Nëse bizneset nuk depozitojnë pranë Qendrës Kombëtare të Biznesit pasqyrën financiare brenda afatit të përcaktuar, ato do të përballen me gjobë në masën 15 000 lekë të parashikuar në pikën 3, të nenit 74, të Ligjit Nr. 9723/2007.

Përveç Qendrës Kombëtare të Biznesit, aplikimet mund të kryhen edhe online në portalin e-Albania, përmes një procedure të shpejtë dhe të thjeshtë brenda 24 orësh, në çdo kohë të ditës.

Bizneset mund të përfitojnë nga mundësia e dorëzimit të bilanceve online edhe pas 31 Korrikut, por ato do të duhet të bashkëlidhin edhe mandatin e pagesës së gjobës së derdhur në një nga bankat e nivelit të dytë, mandat i cili për t’u klasifikuar si i vlefshëm duhet të përmbajë të dhënat sipas faturës së arkëtimit.

Panairi i Ushqimit dhe Agrokulturës në Budapest, organizon  eventin e radhës në datat 20-24 shtator 2017. Panairi OMEK ka një histori dhe traditë ndër vite duke u kthyer në një nga panairet më të rëndësishme në Europën Qendrore. Në vitin 2015, Panairi kishte 950 ekspozitor dhe u vizitua nga mijëra vizitore.

Këtë vit, Panairi- OMEK ka në fokus hortikulturën, makineritë në agrokulturë, prodhimin e ushqimeve me cilësi të lartë, prodhimet lokale, zhvillimin rural dhe turizmin ekologjik, tematika këto të rëndësishme për sektorin e agrokulturës dhe ushqimit në vendin tonë. Duke qenë se kompanitë shqiptare janë gjithmonë në kërkim të mundësive të reja për të zgjeruar tregun e tyre, gjykojmë se pjesëmarrja juaj do të ishte e vlefshme për punën tuaj. Pjesëmarrja juaj në këtë panair mund të jetë në formën e ekspozimit, takimeve B2B, pjesëmarrës në konferencë ose vizitor.  Bashkangjitur gjeni të gjithë informacionin e nevojshëm  sa i përket panairit.

Për çdo informacion shtesë, mund të drejtoheni në adresën e mëposhtme:

Illes Bálint –Këshilltar për agrokulturën dhe mjedisin për vendet e Ballkanit Perëndimor

Tel.: +382 20 602 880, +382 20 602 910

Mobil: +382 67 621 738

Fax: +382 20 625 243

E-mail: Balint.Illes@mfa.gov.hu

Web: www.kormany.hu

Download Attachments:

–Application for professional exhibitors

–Application for small producers

–General Terms and Conditions OMÉK 2017

–List of Products

–OMÉK ppt_EN

Drejtoria e Përgjithshme e Tatimeve që prej datës 20 qershor 2017, ka  nxjerrë njoftimin për tatimpaguesit që paraqesin kërkesë për rimburisimin e TVSH-së.

DPT kujton të gjithë tatimpaguesit, të cilët paraqesin kërkesën për rimbursim të TVSH-së pranë Drejtorisë së Përgjithshme të Tatimeve, që njëkohësisht me kërkesën për rimbursim, duhet të depozitojnë pranë Drejtorisë së Rimbursimit të TVSH-së në DPT, vërtetimin origjinal nga banka e nivelit të dytë të numrit të llogarisë në lekë (IBAN), të biznesit në të cilën do të kryhet kalimi i shumës për rimbursim.

Ky dokumentacion duhet të dorëzohet nga:

• Tatimpaguesit që paraqesin për herë të parë kërkesë për rimbursim të TVSH-së pranë Drejtorisë së Rimbursimit të TVSH-së në Drejtorinë e Përgjithshme të Tatimeve;
• Tatimpaguesit që kërkojnë kalimin e shumës në një llogari të re, të ndryshme nga ajo ku kanë kaluar rimbursimet e mëparshme.

Të interesuarit që dëshirojnë të pajisen me licencë për mbarështimin e kafshëve në një fermë të madhe Agroblegtorale, mund ta marrin këtë shërbim duke klikuar në portalin E-Albania.

Aplikanti, para se të përdorë shërbimin, duhet të marrë dokumentet e nevojshme nga institucionet përkatëse që i japin ato.

Shërbimi ofron mundësinë e ngarkimit të dy llojeve të dokumenteve:

• Dokumente origjinale të skanuara nga aplikanti, të cilat nevojiten të dorëzohen origjinale pranë Qendrës Kombëtare të Biznesit (QKB) pasi është kryer aplikimi online;
• Dokumente me nënshkrim elektronik, të cilat nuk duhet të dorëzohen pranë QKB-së. Për të marrë dokumente me nënshkrim elektronik, aplikanti duhet t’i kërkojë punonjësit të institucionit që gjeneron dokumentin që ta ngarkojë atë të nënshkruar elektronikisht në sistemin e AMS-së (Application Management System). Pas ngarkimit nga punonjësi i institucionit, aplikanti mund ta shkarkojë dokumentin e nënshkruar elektronikisht te “Hapësira ime”, në seksionin “Dokumentet e mia” tek e-albania.
  Pas përfundimit të aplikimit online, aplikanti duhet të dorëzojë në QendrënKombëtare të Biznesit (me postë apo në sportel) versionin origjinal të dokumenteve të skanuara.

Vetëm pasi të jenë dorëzuar këto dokumente në QKB, do të vijohet me trajtimin e aplikimit nga organet përkatëse brenda dhe jashtë këtij institucioni. Nëse aplikimi për licencën e kërkuar aprovohet, aplikantit do t’i shfaqet licenca në profilin e tij tek e-Albania, në seksionin “Dokumentet e mia” te “Hapësira ime”. Gjithashtu aplikanti mund të tërheqë dokumentin e licencës në sportel. Në rast mosaprovimi të dokumenteve apo licencës, aplikanti do të njoftohet me anë të e-mail-it edhe mbi arsyen e mosaprovimit.

Dokumentacioni i nevojshëm

• Akti i regjistrimit të subjektit sipas legjislacionit në fuqi;
• Dokument identifikimi të njohur nga ligji i personit që paraqet kërkesen në emër të subjektit.
• Autorizim që vërteton se personi që paraqet kërkesën (kur ky nuk është vetë titullari i subjektit) në emër të subjektit është i autorizuar prej tij për të kërkuar licensim/leje.
• Përshtatshmëria e njohurive dhe eksperiences së personelit: – Çertifikatë për Drejtuesin Teknik, – Kontratë pune me Drejtuesin Teknik
• Përshtatshmëria e pajisjeve, teknologjisë dhe mjediseve me standardet e veprimtarisë: – Dokumente pronësie dhe/ose përdorimi, – Planimetria e stabilimentit, – Vetëdeklarim për përshtatshmërinë dhe plotësimin e standarteve tekniko-teknologjike dhe higjieno-sanitare të mjediseve dhe pajisjeve.

Dokumentet e kritereve të listuara më sipër mund të ngarkohen në një nga format e mëposhtme:
– Të nënshkruara elektronikisht nga institucioni – Këto dokumente kanë të njëjtën vlerë ligjore me dokumentet origjinale në letër, prandaj nuk është e nevojshme të dërgohen origjinale me postë te QKB.

– Dokumente origjinale të skanuara (të panënshkruara elektronikisht) – Këto dokumente duhet të dërgohen origjinale me postë drejt QKB-së ose të dorëzohen fizikisht te sporteli i QKB-së.

Hapat e procedures

• Identifikohuni si biznes në portal
• Zgjidhni shërbimin “Aplikim për licensë për mbarështim të kafshëve në fermat agroblektorale të mëdha”
• Klikoni butonin” Përdor”
• Plotësoni formularin elektronik me të dhënat e nevojshme mbi adresën e biznesit dhe ngarkoni dokumentet e nevojshme të kritereve të licencës.
• Klikoni butonin “Dërgo” në faqen e fundit të formularit.
• Merrni numrin e çështjes në përgjigje të dërgimit të aplikimit, me të cilën mund të gjurmoni më pas çështjen e hapur duke përdorur shërbimin ”Gjurmimi i çështjeve nga Qendra Kombëtare e Biznesit (licenca)”.
• Dërgoni me postë ose dorëzoni në sportelin e QKB-së versionin origjinal vetëm për dokumentet e skanuara gjatë aplikimit online.
• Sportelisti verifikon dokumentet e aplikimit dhe nëse ato janë të gjitha të nënshkruara elektronikisht, e konfirmon çështjen duke e kaluar te regjistruesi. Nëse një pjesë e dokumenteve janë të panënshkruara elektronikisht (pra, të skanuara nga origjinali), atëherë sportelisti e le pezull çështjen deri në mbërritjen e dokumenteve origjinale.
• Pasi dokumentet origjinale mbërrijnë në QKB, sportelisti verifikon që ato janë të njëjta me versionin e skanuar të dërguar gjatë aplikimit online. Më pas konfirmon krijimin e çështjes (sistemi i brendshëm i QKB-së gjeneron LC-në përkatëse dhe lajmëron aplikantin me e-mail).
• Çështja i shfaqet regjistruesit të QKB-së për trajtim të mëtejshëm. Regjistruesi proceson aplikimin dhe pas aprovimit të tij, çështja i kalon ministrisë për shqyrtim. Në rast se regjistruesi nuk e aprovon aplikimin, aplikanti njoftohet me e-mail për arsyen e refuzimit.
• Ministria shqyrton aplikimin dhe merr vendim aprovues ose refuzues për çështjen. Në rast refuzimi, aplikanti njoftohet me e-mail edhe mbi arsyen.
• Në rastin e aprovimit të aplikimit nga ministria, licenca përkatëse ose aktivizohet direkt prej saj kur dhënia e licencës është pa pagesë ose shfaqet në radhën e punës të sportelistit të QKB-së për ngarkimin e mandatit të pagesës.
• Pas kryerjes së pagesës nga aplikanti, licenca aktivizohet nga sportelisti i QKB-së. Sportelisti vijon me gjenerimin e dokumentit të licencës, e nënshkruan atë elektronikisht dhe e dërgon në seksionin “Dokumentet e mia” te “Hapësira ime” Gjithashtu aplikanti mund të tërheqë dokumentin e licencës në sportel.

Koha e nevojshme për marrjen e shërbimit është 19 ditë pune dhe periudha e vlefshmërisë është pa afat.

Për më shumë informacion klikoni këtu 

Kompanitë e suksesshme “Made in Albania” për prodhimin e verës, do të jenë pjesëmarrëse në panairin “Vinexpo Bordeaux”.

Në datat 18-21 qershor 2017 do të zhvillohet panairi i “Vinexpo Bordeaux”, i cili do të presë një numër të madh prodhuesish të verës dhe blerës nga e gjithë bota. Ky është panairi më i rëndësishëm për promovimin e verës, i cili zhvillohet në një nga qytetet më të famshme për prodhimin e saj në Francë.

Ky panair do të ofrojë mundësi të shkëlqyera bashkëpunimi mes bizneseve, do të krijojë mundësi për gjetje të tregjeve të reja për eksport dhe rizbuluar botën e rritjes së verës. Panairi do të shërbejë si katalizator për biznesin ndërkombëtar me pjesëmarrjen e 2 300 ekspozuesve dhe 45 000 vizitorë tregtarë nga 150 shtete, duke ndihmuar për ndërtimin e një të ardhme të suksesshme të biznesit.

Shqipëria do të përfaqësohet në këtë panair me dy kompani të sukseshme “Made in Albania”: Kantina e Verës Arbri dhe Kantina Çobo.

Drejtoria e Përgjithshme e Doganave ka nxjerrë njoftimin zyrtar “Mbi normën e interesit për llogaritjen e Kamatë Vonesave”.

Sipas doganave bazuar në pikën V.6 “Llogaritja e Kamatë Vonesave” të Udhëzimit Nr.4, date 07.04.2016, normat vjetore të interesit të kredisë të ardhura nga Ministria e Financave që do të jenë si bazë për llogaritjen e kamatë vonesave gjatë 6 mujorit të dytë të vitit 2017, janë: 2.25% nëse borxhi shlyhet brenda muajit dhe 5.25% nëse borxhi nuk shlyhet brenda muajit.

Zyra e borxhit në DPD merre informacion nga Banka e Shqipërisë për normën e interesit të kredisë dhe merr masat e nevojshme për publikimin e të dhënave brenda datave 1 qershor dhe 1 dhjetor me qëllim që respektivisht nga datat 1 korrik dhe 1 janar të çdo viti, norma e miratuar e kamatëvonesës tu jetë bërë e njohur të gjithë  palëve të interesuara dhe të jetë e zbatueshme  për të llogaritur e kontabilizuar çdo muaj detyrimet që rrjedhin prej saj.

Sipas udhëzimit për këtë qëllim  zbatimi i kamatëvonesës mund të fillojë  nga momenti i njoftimit të debitorit për ekzekutimin e vendimit të shpalljes debitor.

Për rastet e lindjes së borxhit doganor për mallrat që janë futur në mënyrë të paligjshme apo nëpërmjet shmangies nga mbikëqyrja doganore, momenti i zbatimit të kamatëvonesës  është çasti i futjes së mallit në mënyrë të paligjshme.

Tirana Business Matching, sipërmarrës nga Emiratet e Bashkuara Arabe, Italia, Austria, Turqia, Kroacia, Kosova, Maqedonia si dhe shumë vende të tjera do prezantojnë mundësi reale të bashkëpunimit dhe investimit në Shqipëri, më datat 28 dhe 29 shtator, në Pallatin e Kongreseve. Ky event ndërkombëtar do të përqendrohet në rolin që kanë investimet e huaja direkte dhe tregtia në rritjen e ekonomisë vendase.

Tirana Business Matching do të jetë një platformë lider në promovimin dhe krijimin e një hapësire për t’u njohur nga afër me strategjinë, prioritet, mundësitë e bashkëpunimit, B2B dhe marrëveshje me kompani shqiptare. Të gjithë pjesëmarrësit do të kenë takime paraprake me partnerët e tyre sipas një axhende të dedikuar për to, për të krijuar një klimë të mirë për bashkëpunim ekonomik. Pjesëtarët do të diskutojnë se si të tërheqin llojin e duhur të investimeve ndërkombëtare dhe partner të përshtatshëm, të cilat do të kontribuojnë në konkurrueshmërinë e ekonomisë shqiptare.

Tirana Business Matching do të bëjë bashkë lider korporatash, politikë-bërës ekonomie, personalitete të huaja, ekspertë, përgjatë një programi intensiv dy ditor.

Temat kryesore ku do të fokusohet eventi do të jenë:

• Infrastruktura
• Turizmi
• Bujqësia dhe Agro-përpunimi
• Inovacioni &Teknologjia
• Energjia
• Tregje financiare

Për më shumë informacion rreth eventit, mund të klikoni  në linkun e mëposhtëm: https://www.b2match.eu/tiranabusinessmatching2017

Instituti Shqiptar i SME-ve – SME Albania – në bashkëpunim me Köstinger Consulting ju njofton organizimin e edicionit të parë të Akademisë Verore të SME-ve në datat 10–16 korrik 2017, në Qendrën Rinore Tiranë.

Akademia Verore e SME-ve është një program 6-ditor që i ofron SME-ve, bazën e nevojshme teorike dhe praktike që atyre u nevojitet për t’u përshtatur me ndryshimet e shpejta me të cilat përballet ekonomia jonë, për të qenë sa më konkurrues në treg dhe për tu lehtësuar procesin e ndërkombëtarizimit.

Akademia Verore e SME-ve 2017 synon të pajisë pjesëmarrësit me njohuri teknike në tre fusha kryesore:

• Standardet – cilësia, shëndeti dhe siguria, menaxhimi i zinxhirit të furnizimit, inovacioni;
• Parashikimi i shitjeve, të drejtat e pronësisë intelektuale, aksesi në financim, menaxhimi i burimeve njerëzore;
• Inteligjenca e marketingut, marrëdhëniet me klientët, rrjetëzimi, menaxhimi i mediave sociale, lidershipi dhe komunikimi BMC, kompetencat ndërkulturore.

Të ftuar të veçantë në Akademinë Verore 2017 do të jenë përfaqësues nga Zyra e Këshilltarit ekonomik e tregtar të Ambasadës së Kinës që do të ofrojnë njohuri të dobishme mbi tregun kinez me qëllim promovimin e zhvillimit dhe bashkëpunimit të ndërmarrjeve të vogla dhe të mesme (SME) mes Shqipërisë, Kinës dhe BE-së. Një nga SME-të pjesëmarrëse do të përzgjidhet për të vizituar Kinën dhe për të krijuar networking me sipërmarrje në Kinë.

Të gjithë sipërmarrësit që dëshirojnë të bëhen pjesë e këtij programi, mund të kontaktojnë dhe të shprehin interesin e tyre në adresën info@sme.al.