Njoftime

Në datat  22-23 Maj 2018, në Republikën e Maltës, do të zhvillohet Forumi i Biznesit Maltë-Shqipëri, me qëllim  hapjen e një rrugë më të gjërë bashkëpunimi dhe mundësish për të dy vendet. Kompanitë shqiptare pjesëmarrëse në këtë event do të jenë nga sektorë të rëndësishëm si: turizmi, ICT, agro-kultura, tregtia, transporti, energjia dhe burimet natyrore. Të pranishëm në këtë event do të jenë dhe Presidenti i Republikës së Shqipërisë Sh.T.Z. Ilir Meta dhe Presidenti i Republikës se Maltes Sh.S.Znj. Marie-Louise Coleiro Preca.

Ky aktivitet do të jetë një mundësi e mirë për sipërmarrjen e të dy vendeve, të ndajnë përvojat e tyre dhe të zhvillojnë takime B2B mes përfaqësuesve të biznesit.

Drejtoria e Tatimeve njofton se cilat janë kushtet e përfitimit nga skema e kompensimit të prodhuesve bujqësorë për qëllime të Tatimit mbi Vlerën e Shtuar, përmes një publikimi të ri.

Sipas kësaj Drejtorie, duhen përmbushur këto kushte:

• Për sa kohë qarkullimi vjetor bazuar në shitjet e kryera për produktet bujqësore, kundrejt personave të tatueshëm, të cilët nuk përfitojnë nga skema e kompensimit, sipas vlerës totale të furnizimit të shënuar në faturë, nuk tejkalon kufirin minimal të përcaktuar të regjistrimit për TVSH-në, për fermerët individual ose pa limit nëse e ushtron veprimtarinë e vetë i përfshirë në shoqëritë e bashkëpunimit bujqësor;
• Nëse furnizojnë mallra me prejardhje nga puna e tyre e kryer për aktivitetet prodhuese bujqësore të përcaktuara sipas këtij udhëzimi;
• Pajisen me një numër identifikimi (NIPT), lëshuar nga drejtoria rajonale tatimore ku ushtron aktivitetin, por pa iu nënshtruar detyrimit për deklarim.

Hapat që duhet të ndjekë fermeri për t’u pajisur me NIPT

1. Aplikimi për t’u pajisur me NIPT bëhet nga vetë fermeri;

2. Për t’u pajisur me çertifikatën e NIPT-it, individi-fermer paraqitet në Drejtorinë e Regjistrimit dhe Shërbimit të Tatimpaguesve në Drejtorinë Rajonale Tatimore të juridiksionit sipas ndarjes, organizimit administrativ, duke paraqitur dokumentacionin si më poshtë:

• Aplikimin për regjistrim sipas formularit përkatës të plotësuar me të gjitha të dhënat e detyrueshme të kërkuara, nënshkruar nga kërkuesi;
• Dokumentin origjinal të identifikimit (letërnjoftimit)/ose kopje të noterizuar të këtij dokumenti, i cili i bashkëngjitet aplikimit për regjistrim;
• Vërtetimin origjinal sipas formatit bashkëngjitur këtij udhëzimi, lëshuar për fermerin prej drejtorisë rajonale të Bujqësisë, Zhvillimit Rural dhe Administrimit të Ujërave, në bazë të të cilit vërtetohet aktiviteti prodhues bujqësor i fermerit.

Për aktivitetin prodhues bujqësor që kryhet në të njëjtin vend/adresë (tokë bujqësore ose adresë ku kryhet veprimtaria bujqësore/blegtorale) në pronësi ose në përdorim, ky vërtetim, për qëllime të pajisjes me NIPT, lëshohet vetëm në emër të një fermeri.

3. Dokumentet shoqëruese të aplikimit duhet të dorëzohen në origjinal ose kopje të njësuara me origjinalin, të jenë në gjuhën shqipe, nuk duhet të përmbajnë korrigjime ose fshirje dhe përmbajtja e tyre duhet të duket qartë, të jetë e lexueshme dhe të lejojë marrjen e imazhit elektronik të dokumentit.

4. Për pajisjen me NIPT të fermerit, janë të detyrueshme këto të dhëna:

a) të dhënat e identifikimit të fermerit, adresa e banimit, kontakte të personit;

b) vendi i ushtrimit të veprimtarisë prodhuese bujqësore. Për të njëjtin vend të veprimtarisë adresë të ushtrimit të veprimtarisë prodhuese bujqësore, pajiset me NIPT, vetëm një fermer i cili ka në pronësi ose në përdorim dhe ushtron veprimtarinë në këtë vend.

c) vendi i ushtrimit të veprimtarisë prodhuese bujqësore;

d) fusha/(at) e veprimtarisë prodhuese bujqë-sore, në qoftë se është e përcaktuar, ose nëse fermeri kryen disa veprimtari prodhuese bujqësore, atëherë specifikohen disa duke filluar nga ajo që mban peshën kryesore;

ç) specimeni i nënshkrimit (firmës) të individit-fermer.

5. Drejtoria Rajonale Tatimore merr në shqyrtim aplikimet për pajisjen me NIPT të fermerëve sipas radhës së paraqitjes së tyre. Drejtoria e regjistrimit dhe shërbimit të tatimpaguesit në drejtorinë rajonale tatimore përkatëse asiston aplikantin fermer në plotësimin e aplikimit dhe ndërkohë verifikon:

a) identitetin e nënshkruesit dhe faktin nëse është person i autorizuar për të bërë regjistrimin;

b) plotësimin e të gjitha të dhënave të detyrueshme të kërkuara, si dhe dokumentet shoqëruese;

c) paraqitjen në formën e kërkuar të dokumentacionit shoqërues, që vërteton të dhënat që regjistrohen;

d) faktin nëse të dhënat e shprehura në formularin e regjistrimit përputhen me të dhënat që përmbajnë dokumentet e kërkuara, që shoqërojnë formularin;

e) faktin nëse dokumentacioni i paraqitur nuk përmban korrigjime ose fshirje, apo është i palexueshëm.

6. Drejtoria Rajonale Tatimore, pasi kryen verifikimet përkatëse dhe vëren përmbushjen korrekte të kushteve për regjistrim, kryen regjistrimin e fermerit në regjistrin tatimor duke evidentuar dukshëm në faqen e regjistrimit faktin që i regjistruari është “fermer” dhe lëshon certifikatën e regjistrimit (NIPT-in) brenda një afati prej dy ditësh nga data e paraqitjes së aplikimit. Emërtimi në certifikatë shkruan: “Fermeri A.B.” ku AB është emri dhe mbiemri i fermerit.

7. Ky regjistrim dhe certifikata e NIPT-it, lëshuar fermerit është e vlefshme vetëm për qëllime të përfitimit nga skema e kompensimit të prodhuesve bujqësorë sipas këtij ligji. Çdo përdorim i NIPT-it të lëshuar fermerit nga ana e tij apo nga persona të tjerë për qëllime të tjera të ndryshme nga ajo e përcaktuar në këtë udhëzim është në kundërshtim me qëllimin e përdorimit të tij.

Shkolla bujqësore profesionale në Eisenstadt, në Austri, ofron bursa edukimi në vreshtari, prodhimin e verës, rritjen dhe përpunimin e frutave si dhe rritjen e perimeve.

Këto trajnime fillojnë në muajin Korrik – Gusht 2018 dhe vazhdojnë deri në Shtator 2019.

Studentët e rinj dhe studentët që kanë përfunduar studimet vitet e fundit nga mosha 19 deri në moshën 27 vjeç, të cilët janë të interesuar për trajnimet e  përmendur më sipër të aplikojnë në linkun KËTU që e gjeni në faqen zyrtare të Ministrisë të Bujqësisë dhe Zhvillimit Rural.

Drejtoria e Përgjithshme e Tatimeve, u bën thirrje tatimpaguesve, të cilët akoma nuk kanë dorëzuar deklaratën e pagesës së Tatim Fitimit për vitin 2017, të marrin të gjitha masat për ta përmbushur këtë detyrim. Nëse kjo deklaratë nuk dorëzohet, nga ana e Administratës Tatimore këta tatimpagues do të konsiderohen me risk dhe do t’i nënshtrohen kontrolleve e investigimeve të vazhdueshme deri në dorëzimin përfundimtar të saj.

Bazuar në analizën e të dhënave, për vitin 2017 rezulton se janë 23,182 tatimpagues të cilët kanë detyrimin për të dorëzuar pranë Administratës Tatimore deklaratën e pagesës së Tatimit mbi Fitimin. Nga këta 21,652 ose rreth 93.4% e totalit e kanë përmbushur tashmë këtë detyrim.

Për 1,528 tatimpagues, të cilët nuk kishin dorëzuar këtë deklaratë, sipas legjislacionit në fuqi nga organet tatimore u bë rivlerësimi automatik për detyrimet që ata duhet të paguajnë për 2017-ën. Nga këta tatimpagues që kishin rivlerësim automatik, 54 dorëzuan deklaratën e tyre për vitin 2017.

Bashkimi i Prodhuesve Shqiptarë i ka dërguar së fundmi një letër Ministrit të Ekonomisë dhe Financave, z. Arben Ahmetaj dhe për dijeni Kryeministrit Edi Rama, ku shpreh shqetësimin për rënien e shpejtë të euros në tregun e brendshëm, që po shkakton humbje të mëdha tek eksportuesit dhe disa segmente të industrisë prodhuese. Nëse euro do të vazhdojë nënçmimin, kjo do të shoqërohet me rënie të fitimeve që do të sjellin më pak invesatime dhe vende pune. Prodhuesit kërkojnë që të bëhet një analizë e thelluar në mënyrë që të gjenden shkaqet reale të rënies së saj të fortë.

Në letër thuhet:

“Nisur nga shqetësimet e marra nga industritë prodhuese-eksportuese shqiptare, mbi fenomenin që po përballen muajt e fundit si pasojë e ndryshimit të pakontrolluar dhe të shpejte të kursit të këmbimit të valutës së huaj, lind nevoja emergjente që ky shqetësim madhor të merret seriozisht në konsideratë nga institucionet shtetërore dhe në veçanti nga ministria Juaj.

Nga analizat e kryera përgjatë gjithë kësaj kohe mbi kompanitë prodhuese-eksportuese të disa sektorëve, vihet re se ky fenomen ka prekur drejtpërdrejt fitimin e eksportuesit duke i nxjerrë kompanitë me humbje, për ketë arsye nuk mund të qëndrohet më në pasivitet për këtë çrregullim të tregut valutor.

Ndryshimi i kursit gjatë këtij 4 mujori për vitin 2018, është i papritur dhe mjaft shqetësues për prodhuesit. ndërkohë që nuk është marrë asnjë masë për të rikthyer stabilitetin e kursit të këmbimit dhe nuk kemi informacion se çfarë do të ndodhe më tej.

Nëse kursi i këmbimit do të ndjekë të njëjtin ritëm në muajt në vazhdim, sipërmarrjet prodhues-eksportues do të rezultojnë me një fitim të përgjysmuar, çka do të thotë mungesë investimesh, mungesë rritje pagash, ulje të punësimit, etj.. Qeveria duhet të ketë kujdes në çdo politikë publike që ndërmerr, me qëllim që të sigurojë prodhuesit shqiptarë, që nuk do të ketë ndikim negativ në konkurrueshmërinë e produkteve “Made in Albania”. Aq më tepër edhe në kuadër të nismave rajonale për një ekonomi të përbashkët të Ballkanit Perëndimor.

Bashkimi i Prodhuesve Shqiptarë u bën thirrje Ministrisë së Financave dhe Ekonomisë, për ngritjen e menjëhershme të një grupi pune për analizimin e kësaj situate, si dhe marrjen e masave për të ndaluar zhvIerësimin e monedhës së huaj në vend”, përfundon letra

Z. Arben Shkodra, Sekretar i Përgjithshëm i Bashkimit të Prodhuesve tha për Monitor se ata kërkojnë të gjendet shkaqet dhe arsyet që kanë çuar në zhvlerësimin e lartë të euros, pasi nuk ka një shpjegim të logjikshëm zyrtar të asaj që po ndodh. Rritja ekonomike nuk vlerësohet në nivele aq të larta sa të justifikojë këtë forcim të lekut, pohoi ai. Prodhuesit nuk kanë marrë ende një përgjigje nga ministri Ahmetaj.

Euro ka hyrë në një trajektore rënëse në tregun e brendshëm që në gjysmën e dytë të vitit 2016, duke zbritur në 136 lekë në dhjetor, nga niveli prej 140 lekësh që ishte stabilizuar në periudhën 2010-2015. Tkurrja vijoi edhe përgjatë vitit 2017, ku euro e mbylli vitin me një mesatare prej 134 lekësh. Më i fortë ka qenë nënçmimi në muajt e parë të këtij viti, ku ditët e fundit euro zbriti nën 127 lekë, niveli më i ulët që nga shkurti i vitit 2009. Rënia e monedhës së përbashkët ka tërhequr dhe dollarin, i cili ka zbritur në 106 lekë, nga gati 130 lekë që ishte në fillim të vitit 2017.

Bashkimi i Prodhuesve Shqiptarë në mënyrë të vazhdueshme ka zhvilluar tryeza teknike në lidhje me problematikat e krijuara nga aplikimi i tarifës së koncesionarit për segmentin rrugor Milot-Morinë, me grupet e interesit që përfaqësojnë një grup kategorish të produkteve shqiptare. Këto shoqëri kanë shprehur dhe kanë analizuar problemet dhe kostot që shkaktohet nga kjo tarifë për eksportuesit, si dhe ndikimin që do të ketë me konkurrueshmërinë e produkteve me vendet e rajonit.

Në vijim të komunikimeve dhe pas takimit të parë të zhvilluar me grupin negociues përfaqësuar nga Ministria e Infrastrukturës dhe Energjisë, Bashkimi i Prodhuesve Shqiptarë del me disa propozime zyrtare mbi çështjen e tarifës së koncesionarit për segmenti rrugor Milot-Morinë, për të gjetur një zgjidhje sa më të favorshme që çon në përmirësimin e klimës së biznesit dhe rritjen e konkurrueshmërisë të produkteve shqiptare:

1. Kërkojmë shtyrjen e afatit të implementimit të tarifës më datë 1 shtator 2018;
2. Kërkojmë të ketë një rishikim në ulje të tarifës për kamionet, duke u bazuar në bileta ditore në tarifën 16 euro, vajtje-ardhje, 24 orë;
3. Të jemi pjesë e vazhdueshme e tryezave negociuese mbi çështjen e tarifës së koncesionarit për segmenti rrugor Milot-Morinë, deri në përfundim të kënaqshëm për të dyja palët.

Agjencia Shqiptare e Zhvillimit të Investimeve (AIDA), bën publike fondet në dispozicion të biznesit për vitin 2018 nga buxheti i shtetit: Fondin Shqiptar të Konkurrueshmërisë, Fondin e Ekonomisë Kreative (Artizanatit), Fondin në mbështetje të Sipërmarrjeve të reja ”Start Up” dhe Fondin e Inovacionit.

Këto fonde i dedikohen ndërmarrjeve mikro, të vogla dhe të mesme të sektorit prodhues dhe të shërbimit; si industria e lehtë, turizmi, kërkimi dhe zhvillimi, inovacionit dhe teknologjisë, agropërpunimit, dizenjimit, artizanatit etj.

1. Fondi i Konkurrueshmërisë (totali vjetor 28 milion lekë)

Ky fond ka për qëllim mbështetjen dhe përmirësimin e kapaciteteve të NVM-ve shqiptare në mënyrë që ato të jenë të përgatitura për t’iu përgjigjur zhvillimeve dhe kërkesave të tregut kombëtar dhe ndërkombëtar.

Kushte dhe informacione

Ky fond mbështet ndërmarrjet e vogla ose të mesme me fokus prodhimin dhe eksportin, të cilat janë të regjistruara në QKB prej 2 ose më shumë vitesh.

Vlera e mbulimit të projektit ndahet sipas raportit: 70% grant dhe 30% vetëfinancim nga ndërmarrja.

Vlera maksimale përfituese për çdo projekt të aplikuar është jo më e shumë se 1’400’000 lekë.

Fondi mbulon projektet për qëllimet e mëposhtme:

• çertifikim produkti;
• ambalazhim dhe etiketim të produkteve;
• pjesëmarrje në panaire ndërkombëtare;
• krijim faqesh interneti;
• koncept edhe dizenjim të materialeve promovuese.

2. Fondi i Ekonomisë Kreative (totali vjetor 10 milion lekë )

Fondi ka për qëllim zhvillimin e sektorit të artizanatit dhe zejtarisë në Shqipëri, për të krijuar mjedisin e favorshëm për rritjen e qendrueshmërisë  ekonomike të aktivitetit dhe krijimin e vendeve të reja të punës.

Kushte dhe informacione

Fondi i Ekonomisë Kreative i shërben Ndërmarrjeve Mikro dhe të Vogla që ushtrojnë aktivitetin e tyre në sektorin e artizanatit, të cilat janë të regjistruara në QKB prej 1 ose më shumë vitesh.

Vlera e mbulimit të projektit ndahet sipas raportit: 80% në formë granti dhe 20% vetëfinancim nga ndërmarrja.

Vlera maksimale përfituese për çdo projekt të aplikuar është jo më e shumë se 500.000 lekë.

Fondi mbulon projektet e përzgjedhura nga sektori i artizanatit specifikisht për qëllimet e mëposhtme:

• zhvillimin e produkteve të reja;
• blerjen e pajisjeve për nxitjen e prodhimit;
• marketingun e produktit;
• kualifikimin e ndërtimin e kapaciteteve menaxheriale të ndërmarrjes.

3. Fondi Start-Up (totali vjetor 10 milion lekë)

Mbështet bizneset e sapo krijuara “Start-Up” në Shqipëri për krijimin e bazave për një zhvillim ekonomik të qëndrueshëm, si dhe krijimin e vendeve të reja të punës.

Kushte dhe informacione

Mund të aplikojnë, subjektet që janë të regjistruara në QKB, nga 0-2 vjet.

Vlera e mbulimit të projektit ndahet sipas raportit: 70% në formë granti dhe 30% vetëfinancim nga ndërmarrja.

Vlera maksimale përfituese për çdo projekt është jo më e shumë se 500.000 lekë.

Fondi mbulon projektet për qëllimet e mëposhtme:

• Investime në pajisje dhe teknologji për nxitjen e prodhimit/shërbimit;
• Promovim, publikim dhe hartim materialesh promovues;
• Përshtatje produkti – duke përfshirë ambalazhim dhe etiketim;
• Kualifikim dhe trajnim për rritjen e aftësive sipërmarrëse;
• Krijim faqesh në internet dhe zhvillim të tregtisë elektronike;
• Pjesëmarrje në panair ose ekspozitë brenda apo jashtë shtetit, si vizitor apo ekspozues.

4. Fondi i Inovacionit (totali vjetor 15 milion lekë)

Ky fond ka për qëllim nxitjen e NMVM-ve në auditimin e nevojave të tyre për inovacion dhe teknologji dhe më tej në identifikimin e furnizuesve të teknologjisë dhe partnerëve në shtete të tjera.

Kushte dhe informacione

Mund te aplikojnë, subjekte që janë të regjistruara  në QKB prej 1 ose më shumë vitesh.

Vlera e mbulimit të projektit ndahet sipas raportit 50% grant dhe 50% vetëfinancim nga ndërmarrja.

Vlera maksimale përfituese për çdo projekt të aplikuar është jo më e shumë se 400.000 lekë.

Bëjnë përjashtim vetëm subjektet që do të aplikojnë për zërin makineri-paisje, ku vlera maksimale që do përfitojnë është 600.000 lekë.

Fondi mbulon projektet për qëllimet e mëposhtme:

• Auditim të kapacitetit inovativ dhe teknologjik që synon t’u mundësojë ndërmarrjeve aplikuese vlerësimin për nivelin ekzistues të teknologjisë dhe mundësitë për rinovimin e tyre të inovacionit dhe/ose pozicionimit teknologjik, sipas një strukture konkurruese zhvillimi;
• Ndërkombëtarizimin e teknologjisë, e cila synon t’u mundësojë ndërmarrjeve aplikuese të Identifikojnë dhe të inspektojnë teknologjinë që kërkojnë të përshtatin;
• Pjesëmarrje në panaire inovacioni /teknologjie/ RDI dhe të ngjashme;
• Promovim në lidhje me inovacione të ndërmarrjes; Kostot e licencave (software ose hardware) ose patentave;

Për më shumë informacione http://aida.gov.al/home