Lajme

Mblidhen përfaqësues të prodhuesve së Shqipërisë dhe Kosovës mbi kërkesa të përbashkëta ndaj Qeverive për heqjen e barrierave tarifore dhe jo-tarifore për qarkullimin e lirë tregtar dhe ekonomik ndërmjet Shqipërisë dhe Kosovës

Përfaqësues të Bashkimi të Prodhuesve Shqiptarë, Klubit të Prodhuesve të Kosovës me mbështetjen e “Forumit Ekonomik të Prodhuesve Kombëtar Shqiptarë”, si dhe të Odës Ekonomike të Kosovës, u mblodhën sot në Tiranë, datë 23 nëntor 2018, për të deklaruar dhe nënshkruar kërkesa specifike drejtuar qeverive përkatëse të Shqipërisë dhe Kosovës, lidhur me problematikat që sipërmarrjet kombëtare të dy shteteve (Shqipëri dhe Kosovë), hasin gjatë ushtrimit të aktivitetit të tyre.

Kërkesat konsistojnë në problematikat dhe procedurat tarifore dhe jo-tarifore në sektorin doganor, konkretisht si më poshtë:

• Heqjen e pagesës për skanerin në Republikën e Shqipërisë për të gjithë qarkullimin tregtar import-eksport, Shqipëri-Kosovë; (Kërkesa i drejtohet qeverisë së Shqipërisë)
• Heqja e pagesës për terminalet doganore në Republikën e Kosovës për të gjithë qarkullimin tregtar import-eksport, Shqipëri-Kosovë dhe Kosovë-Shqipëri; (Kërkesa i drejtohet qeverisë së Kosovës)
• Njohja e certifikimeve dhe analizave fito sanitare të të gjithë produkteve që i nënshtrohen këtyre analizave dhe certifikatave; (Kërkesa i drejtohet të dy qeverive)
• Njohja reciproke e regjistrimit te produkteve farmaceutike (autorizimi për tregtim) nga agjencitë relevante, për prodhuesit e Kosovës dhe Shqipërisë në të dyja tregjet. (Kërkesa i drejtohet të dy qeverive)
• Përshpejtimi i procedurave doganore, në trajtimin e praktikave të qarkullimit tregtar dhe ekonomik ndërmjet dy shteteve; (Kërkesa i drejtohet të dy qeverive)
• Të hiqet tërësisht për prodhuesit e dy vendeve taksa prej 26 EUR vajtje/ardhje për Kamionët, pasi e njëjta paraqet pengesë në zhvillimin dhe bashkëpunimin ekonomik mes dy vendeve; (Kërkesa i drejtohet qeverisë shqiptare)
• Heqja e të gjitha barrierave duke përfshirë edhe akcizën; (Kërkesa i drejtohet dy qeverive)
• Krijimi i Bankës Zhvillimore të Përbashkët Shqipëri-Kosovë; (Kërkesa i drejtohet dy qeverive)
• Të bëhen pjesë e mbledhjeve të qeverive të përbashkëta përfaqësues të “Bashkimit të Prodhuesve Shqiptarë” dhe përfaqësues të “Klubit të Prodhuesve të Kosovës; (Kërkesa i drejtohet të dy qeverive)

Afati për katër pikat e fundit është mbledhja e parë e përbashkët e të dy qeverive.

Në lidhje me rishikimin e kufirit të akcizës së birrës si dhe për disa çështje të tjera që prekin sektorin e konvertuesve të plastikës dhe prodhuesve të miellit, anëtarët e Bashkimit të Prodhuesve Shqiptarë dhe Klubit të Prodhuesve të Kosovës do të zhvillojnë tryeza sektoriale për të arritur kërkesa të përbashkëta në funksion të përmirësimit të marrëdhënieve ekonomike, tregtare të dy vende.

Këto kërkesa pasi të nënshkruhen nga prodhuesit e dy vendeve do t’i ridërgohen qeverive respektive për t’i marrë në konsideratë.

Bashkimi i Prodhuesve Shqiptarë, Klubi i Prodhuesve të Kosovës, si dhe Forumi Ekonomik i Prodhuesve Kombëtar Shqiptarë, nuk do të ndalin së kërkuari në lidhje për sa më sipër, deri në momentin e përmbushjes së këtyre kërkesave nga Qeveria e Shqipërisë dhe Kosovës.

Takimi i ardhshëm do të zhvillohet në datë 26 nëntor 2018, në Pejë.

[slider style=”flat” category=”AMU – KPK” orderby=”date” order=”ASC”]

Rreth 600 restorante në diasporë me pronarë shqiptarë apo që menaxhohen nga shqiptarët janë evidentuar nga përfaqësitë diplomatike për të qenë në dispozicion të eksportuesve dhe shoqatave të agrobiznesit në Shqipëri. Qëllimi i kësaj nisme në kuadër të Diplomacisë Ekonomike është shtimi dhe mundësia për rritje të potencialit të eksportit.

Ministria e Bujqësisë dhe Zhvillimit Rural dhe Ministria për Europën dhe Punët e Jashtme organizuan eventin e promovimit të prodhimit shqiptar drejt diasporës.

Në të morën pjesë anëtarët e Bashkimit të Prodhuesve Shqiptarë, që përfaqësojnë sektorë të ndryshëm të industrisë së prodhimit, si mjaltë, ujë mineral, bulmet, lengje të freskëta frutash, kantina vere, pije alkoolike, etj.

Pas fazës së evidentimit të këtyre 600 restoranteve, do të bëhet kanalizimi i të gjitha energjive që këto restorante të kenë mundësi të bëjnë pjesë të asortimenteve të tyre prodhime shqiptare, që mund të eksportohen në tregjet europiane dhe të Amerikës së Veriut.

Së shpejti ky projekt do të finalizohet me një aplikacion që do të quhet “Albanian Flavors”, ku do të prezantohen prodhimet shqiptare.

[slider style=”flat” category=”Promovimi i prodhimeve shqiptare” orderby=”date” order=”ASC”]

Bashkimi i Prodhuesve Shqiptarë, pas rishikimeve të propozimeve nga prodhuesit për paketën fiskale 2018 dhe mos marrjes në konsideratë nga Ministria e Financave dhe Ekonomisë, si dhe pas konsultimeve të fundit të kryera me anëtarët e saj, mbi propozimet për paketën fiskale për vitin 2019, ka përgatitur propozimet e sipërmarrjes prodhuese për vitin 2019, si vijon:

1. Të rishikohet në mënyrë integrale ligji për procedurat tatimore

Pas ndërhyerjeve pothuajse çdo vit të këtij ligji, ka ardhur koha që ky ligj të rishikohet në mënyrë integrale. Të bëhet një vlerësim juridik duke marrë në konsideratë të gjithë ndryshimet e kryera ndër vite, si dhe të gjitha problematikat e marrëdhënies tatim pagues – autoritet tatimor, me qëllim shmangien e të gjthë mbivendosjeve/përplasjeve që ndodhin gjatë aplikimit të ligjit dhe udhëzimit përkatës. Ka ardhur momenti të kemi një ligj të procedurave tatimore më të thjeshtë, më të kuptueshëm nga ana e tatim paguesve, si dhe më të mirë implementueshëm nga ana e organeve tatimore.

2. Ligji Nr. 9975, 28.07.2008 “Për Taksën Kombëtare”, i ndryshuar

2.1 Nenit 2, pika 8.4 të projektligjit “Për Taksën Kombëtare”, të ndryshuar, të propozuar nga Ministria e Financave dhe Ekonomisë:

Ishte: Në rastin e prodhimit brenda vendit, taksa e ambalazheve prej qelqi, mblidhet nga Administrata Tatimore sipas afateve dhe procedurave të deklarimit në këtë ligj. Administrata Tatimore monitoron dhe kontrollon lëndët e para që përdoren për prodhimin e ambalazheve të qelqit, si dhe granulatin e importuar me qëllim prodhimin e materialeve dhe ambalazheve plastike brenda vendit.

Të bëhet: Për produktet dhe ambalazhet e qelqit dhe plastikës të prodhuara brenda vendit nga riciklimi i mbetjeve të qelqit dhe plastikës, taksa të caktohet në masën 1 lekë për kg, me kusht që subjekti ta provojë këtë fakt me anë të kartës teknologjike të prodhimit. Kjo taksë mblidhet nga administrata tatimore sipas afateve dhe procedurave të deklaruara në këtë ligj. Administrata tatimore monitoron dhe kontrrollon lëndët e para që përdoren për prodhimin e produkteve dhe ambalazheve prej qelqi dhe plastike nga procesi i riciklimit të mbetjeve që gjenerohen brenda vendit.

2.2 Ndryshimi i taksës mbi ambalazhet dhe produktet plastike

Kjo taksë sot është 100 lekë/kg + TVSH. Aplikohet për disa produkte si kapsulat që përdoren për prodhimin e shisheve plastike (kodi doganor 39235010) të ujit apo pijeve, apo kutitë plastike që përdoren për ambalazhimin e produkteve ushqimore të cilat përdoren gjerësisht edhe për produktet bujqësore si luleshtrydhe, domate, qershi, etj.

Evidentojmë që nga kjo taksë përjashtohen shumë produkte. Ndër më të rëndësishmit është granulati plastik, i cili nuk taksohet mbasi konsiderohet “lëndë e parë”.

Problemet që sjell kjo taksë me mënyrën si aplikohet:

• Taksa aplikohet vetëm për disa produkte dhe rëndon së tepërmi kostot e tyre. Konkretisht rrit me 52 % koston e kapsulave për prodhimin e shisheve. Në vendet e rajonit si Greqi, Maqedoni, Mali i Zi, Kosovë, Bullgari, për këto produkte aplikohet vetëm taksë doganore në masën 0 ÷ 6 %;
• Përjashtimi i disa artikujve nga kjo taksë bëhet shkak për evazion në treg. Kjo vjen mbasi granulati plastik (artikull i përjashtuar nga taksa) deklarohet i përdorur kryesisht për artikuj të përjashtuar nga kjo taksë (tip fletë plastike për serat), ndërkohë që është përdorur për artikuj të taksuar që tregtohen pa faturë;
• Si pasojë e përjashtimeve dhe evazionit fiskal që ato gjenerojnë,  shteti mbledh vetëm 6 ÷ 7 lekë/kg plastikë nga 100 lekë/kg që duhet të mblidhte.

Propozojmë:

Kjo taksë të bëhet 15 lekë/kg taksa për të gjithë produktet plastike, kodi doganor 39. (këtu hyjnë edhe kapsulat kod 39235010). Ky rregullim do të sillte disa efekte pozitive:

• Do të çlironte industritë prodhuese nga një super taksë;
• Do të ulte çmimet në treg dhe do të stimulonte konsumin;
• Do të ndalonte evazionin;
• Do të arkëtonte 200 % të ardhura në arkën e shtetit.

3. Ligji Nr. 61/2012 “Për Akcizat në Republikën e Shqipërisë”

3.1 Kërkojmë heqjen e akizës për lëndët e para djegëse.

3.2 Taksa e Karbonit/Taksa e Akcizës

Për shkak të ndryshimeve të fundit gjatë vitit 2012 në ligjin “Për akcizën” dhe “Për taksat kombëtare”, Shqipëria aktualisht aplikon taksat indirekte për lëndët djegëse të ngurta, në shumën 5 lekë/kg (d.m.th 2 lekë/kg për akcizën dhe 3 lekë/kg për taksën e karbonit). Këto taksa rrisin çmimin e importit të karburantit me 45% – 50%.

Kjo rritje në industrinë e çimentos përkthehet një barrë e konsiderueshme në strukturën e saj të kostos, që ka një efekt prej ~ 2.5 – 3 euro kosto shtesë për ton të produktit përfundimtar, në varësi të llojit të çimentos së prodhuar.

Në tregjet ndërkombëtare tregtare kjo pengesë në kosto është e rëndësishme dhe nëse nuk hiqet do të dëmtojë shumë shpejt kapacitetin e Shqipërisë për të eksportuar çimento.

Si BE- ja dhe vendet fqinje (me përjashtim të një takse të vogël në Kosovë) nuk aplikojnë taksa indirekte mbi lëndët djegëse të cilat përdoren në industri. Produktet e energjisë dhe energjia elektrike në vendet e BE-së tatohen vetëm kur ato përdoren si lëndë djegëse për motorë apo për ngrohje dhe jo kur përdoren si lëndë e parë/lëndë djegëse në procesin e prodhimit, apo për qëllime të reduktimit kimik ose në procese elektrolitike dhe metalurgjike. (Direktiva e BE-së 2003/96 / KE, e datës 27 tetor 2003, e cila ristrukturon kuadrin ligjor të Komunitetit për tatimin e produkteve të energjisë dhe energjinë elektrike).

Sa më sipër, Taksa e Akcizës, si dhe Taksa e Karbonit, duke qenë se janë taksa indirekte, zakonisht aplikohen për produktin përfundimtar dhe si të tilla mbulohen nga konsumatori përfundimtar. Duke pasur parasysh mënyrën se si këto taksa indirekte aplikohen aktualisht në Shqipëri ato rendojnë produktin ndërmjetësues, duke prekur në këtë mënyrë prodhuesin.

Përveç sa më sipër dhe në lidhje me Taksën e Akcizës, edhe mekanizmi i rimbursimit i parashikuar nga Ligji për Akcizën nuk siguron çlirimin e nevojshëm të ofruar nga kuadri ligjor i BE-së, pasi legjislacioni evropian aplikon përjashtimin e akcizës dhe jo rimbursimin për produktet e energjisë kur ato përdoren si lëndë e parë/lëndë djegëse në procesin e prodhimit apo për qëllime të reduktimit kimik apo në proceset elektrolitike dhe metalurgjike.

Propozojmë:

Heqja e Taksës së Akcizës dhe Karbonit, duke zbatuar në këtë mënyrë standardin e aplikuar në BE, pritet të rivendosë kushte të barabarta në tregun e çimentos së Shqipërisë dhe në këtë mënyrë të përmirësojë konkurrencën e industrisë vendase e cila është prekur në mënyrë disproporcionale nga krizat ekonomike. Duhet të theksohet se industria vendase e çimentos i shton produktit përfundimtar vlera lokale të konsiderueshme, kontribuon në të ardhurat tregtare të Shqipërisë me ~ 48 milionë euro në vit dhe siguron punësim për mbi 800 punonjës të drejtpërdrejtë.

Megjithatë, duke pasur parasysh ndikimin e konsiderueshëm të këtyre taksave në buxhetin e shtetit, një zgjidhje alternative është:

• zëvendësimi i tyre me një rritje ekuivalente në T.V.SH ose vendosjen e një takse tjetër në vend të saj, për tu aplikuar për produktin përfundimtar (çimento);
• heqjen e taksës së karbonit dhe akcizës në masën e zbatueshme për eksportet që kryhen dhe vendosjen e taksave doganore ekuivalente për produktet e çimentos të importuara;
• të paktën aplikimin e një skeme rimbursimi për Taksën e Karbonit në formën që aplikohet gjithashtu për Taksën e Akcizës.

4. Neni 282 i Ligjit Nr. 102/2014, datë 31.7.2014 “Kodi Doganor i Republikës së Shqipërisë”, i ndryshuar

• Kundër vendimit të autoriteteve doganore, shkelësi mund t’i paraqesë Drejtorit të Përgjithshëm të Doganave një kërkesë ankimore brenda 30 ditëve nga data e njoftimit.
• Për t’i paraqitur ankesën, ankimuesi duhet të paguajë shumën e përgjithshme të detyrimeve të importit ose eksportit, sipas përkufizimeve të këtij titulli, si dhe të garantojë shumën e sanksioneve të aplikuara për shkeljen objekt konflikti.

Probleme që krijon ky nen:

Konsiderojmë rastin që ndodh vazhdimisht në doganë ku subjekte të rregullta ngarkohen nga autoritetet doganore me detyrime dhe sanksione (gjoba) të padrejta të cilat ata i kundërshtojnë. Më dendur këto ankesa janë për dy shkaqe:

1. Interpretim i gabuar i kodit të artikullit nga i cili llogaritet një detyrim shtesë. Shpesh kodi është konform kodit euvropian dhe ndryshohet nga autoritetet doganore.
2. Detyrimi që lind për shkak të aplikimit jo konform të çmimeve të referencës.

Shumë dendur këto detyrime apo gjoba vendosen nga kontrolle aposteriori.

• Pra, sipas Nenit 1 ankimuesi ka të drejtën të paraqesë kërkesën.
• Sipas Nenit 2 duhet të paguajë detyrimin e plotë.

Propozojmë:

Unifikim të nenit 2 me ligjin për procedurat tatimore, pra pranimin e alternativës që ankimuesi të vendosë garanci bankare për shumën e detyrimit.

Neni 2 do të shkruhej:

Për të paraqitur ankesën, ankimuesi duhet të paguajë shumën e përgjithshme të detyrimeve të importit ose eksportit, ose të paraqesë një garanci bankare për këtë shumë.

5. Ligi Nr. 8438, datë 28.12.1998, “Tatimi mbi të ardhurat”, i ndryshuar

Tatimi mbi të Ardhurat e Korporatës – Zgjatja e periudhës së shfrytëzimit për humbjet Tatimore

Një nga synimet kryesore të Qeverisë Shqiptare është të tërheqë gatishmërinë e investimeve të huaja direkte (IHD) për të kryer investime Greenfield (në fushën e gjelbër). Duke pasur parasysh natyrën dhe përmasën e këtyre investimeve Greenfield, zakonisht nevojiten 3-5 vjet përpara se këto investime të fillojnë të nxjerrin fitime. Në disa raste, për shkak të kushteve të tregut, kjo periudhë mund të jetë edhe më e gjatë. Në rrethana të tilla, këto shoqëri mbledhin humbjet të cilat duhet të shfrytëzohen ndaj fitimeve në të ardhmen.

Legjislacioni shqiptar, sipas Ligjit për “Tatimin mbi të Ardhurat” nr. 8438 datë 28.12.1998, i ndryshuar, parashikon që humbjet tatimore mund të barten dhe shfrytëzohen për një periudhë jo më shumë se 3 vjet.

Në referim të argumentit të lartpërmendur, kur këto Shoqëri fillojnë të nxjerrin fitime dhe duke marrë parasysh kushtet aktuale ekonomike të pandryshuara, është e qartë se dispozita përkatëse e legjislacionit shqiptar nuk i shërben qëllimit të krijimit të një ambienti tërheqës për investimet Greenfield. Përkundrazi, vendet fqinje si Greqia, Bullgaria, Serbia, Turqia u japin Shoqërive një periudhë minimale prej 5 vjetësh për të shfrytëzuar humbjet tatimore.

Propozojmë:

Duhet pasur parasysh fakti se vendet e BE-së, si p.sh Italia, u japin Shoqërive një periudhë të pacaktuar kohore për shfrytëzimin e humbjeve tatimore të krijuara gjatë 3 viteve të para të investimit, në këtë drejtim, si dhe me qëllim krijimin e një mjedisi tërheqës për investimet e huaja direkte që kryejnë investime Greenfield, rekomandohet së tepërmi që periudha 3 vjeçare e përcaktuar në ligjin “Për Tatimin mbi të Ardhurat”, të zgjatet minimalisht 10 vjet.

6. Ligji 9632, datë 30.10.2006, “Për sistemin e taksave vendore”, të ndryshuar

6.1 Në aneksin nr. 2 të projektligjit ku janë përcaktuar “Kategoritë minimale dhe nivelet treguese të taksës vendore mbi pasurinë e paluajtshme truall (jo hapsirë publike)”, vihet re se vlera e taksës së truallit për qëllime biznesit krahasuar me vlerën e taksës së truallit për qëllime banimi nga individët është nga 35 herë – 85 herë më e lartë.

Propozojmë:

Të barazohet vlera e taksës së truallit për qëllime biznesit me vlerën e taksës së truallit për qëllime banimi nga individët.

6.2 Shkalla e taksës – Neni 22/2

Shkalla e taksës për ndërtesën që përdoret, shfrytëzohet për veprimtari ekonomike, kërkojmë të bëhet 0.05% për veprimtaritë prodhuese.

6.3 Taksat Lokale – Taksat e Përkohshme

Ligji për Taksat Vendore (Neni 33) parashikon që Këshilli Bashkiak, kur gjykon të domosdoshme, vendos taksa me karakter të përkohshëm, në interes të përgjithshëm të komunitetit, në territorin brenda juridiksionit të tij. Sidoqoftë, nuk jepet asnjë specifikim tjetër në ligj lidhur me kufizimet e këtij autoriteti, arsyetimin e domosdoshëm që duhet të mbështesë vendimin për vendosjen e këtyre taksave, si dhe qartësimin se çfarë do të ishte e domosdoshme për komunitetin, për qëllimet e vendosjes së këtyre taksave. Kjo e lë Këshillin Bashkiak një autoritet që tejkalon vetë ligjin dhe krijon pasiguri për të ardhmen.

Propozojmë:

Me qëllim garantimin e zbatimit të parimeve kushtetuese në vendosjen e Taksave, por gjithashtu për të shmangur ekspozimin e paparashikueshëm dhe të pajustifikuar financiar të operatorëve të biznesit, Ligji duhet të përcaktojë qartësisht dhe Këshillat Bashkiakë duhet të përcaktojnë dhe parashikojnë qartësisht në vendimet e tyre, gjatë vendosjes së taksave të tilla të përkohshme, me arsyetimin e mjaftueshëm mbi:

• të specifikohet kur Këshillat Bashkiake kanë të drejtë të aplikojnë këto taksa:
• nevojat përkatëse të komuniteteve për përfitimin e të cilëve aplikohen këto taksa;
• kushtet dhe kriteret për llogaritjen dhe implementimin e këtyre taksave;

Gjithashtu, këto taksa nuk duhet:

• të aplikohen më shumë se një periudhë më të gjatë se 6 muaj;
• të mos jenë më shumë të larta se 50% kundrejt taksave të vendosura nga parlamenti.

7. Ligjin nr.9920, datë 19.05.2008, “Për procedurat tatimore në Republikën e Shqipërisë”, të ndryshuar

7.1 Neni 7

Neni 71/2 “Përdorimi i metodave alternative të vlerësimit ne rastet e veprimeve për shmangien e tatimit dhe abuzimit me parimet e ligjit tatimor”, pika 1 shkronja d, propozuar nga Ministria e Financave dhe Ekonomisë, është: evidentohen elementë të veprimeve/transaksioneve që synojnë shmangien ose uljen e detyrimeve tatimore, për përcaktimin e detyrimit tatimor, administrata tatimore nuk merr parasysh një veprim/transaksion apo një seri veprimesh/transaksionesh, të cilat, duke qene se janë ndërmarrë me synim përfitimin e një avantazhi tatimor që vjen në kundërshtim me qëllimin e ligjit,  rezultojnë fiktive në bazë të te gjitha fakteve dhe rrethanave.

Propozojmë:

Kjo pikë nuk duhet të vendoset në ligjin për “Procedurat tatimore”, pasi avantazhi tatimor është e drejtë themelore e çdo personi për ta zgjedhur.

7.2 Neni 8

Në nenin 75 “Detyrimet tatimore të paguara më tepër” shtohet pika 3 me përmbajtjen si më poshtë:

“3. Kompensimi nga teprica kreditore i detyrimeve tatimore brenda çdo tatimi, me përjashtim të kontributeve të sigurimeve shoqërore dhe shëndetsore, kryhet automatikisht nga sistemi informatik”.

Propozojmë:

Kompensimi nga teprica kreditore i detyrimeve tatimore brenda çdo tatimi dhe nga tatimi në tatim, me përjashtim të kontributeve të sigurimeve shoqërore dhe shëndetsore, kryhet automatikisht nga sistemi informatik”.

7.3 Neni 12

Në nenin 107 “Pagesa e detyrimit tatimor, objekt ankimi”, në fund të fjalisë në pikën 2 shtohet shprehja me fjalët si më poshtë:

…si dhe kamatvonesat e llogaritura.”

Propozojmë:

Të mos shtohen këto fjalët.

7.4 Neni 13

Në nenin 115 “Plotësim i pasaktë i deklaratës tatimore”, në pikën “2”, shtohet në fund, fjalia me këtë përmbajtje:

“Shumë e papaguar e detyrimit tatimor konsiderohet edhe deklarimi i pasaktë i tepricës kreditore të TVSH-së, e cila llogaritet si diferencë e tepricës kreditore që duhej deklaruar me tepricën kreditore të deklaruar”.

Propozojmë:

Të mos shohet fjalia në pikën “2”.

7.5 Neni 14

Pas nenit 115/1 shtohet neni 115/2 me përmbatjen si më poshtë:

“Neni 115/2

Dënimet për mosnjoftimin e ndryshimeve në lidhje me ndryshimin e pronësisë

Nëse një person juridik nuk njofton administratën tatimore në lidhje me ndryshimet e pronësisë, sipas kërkesave të nenit 27/1 “Ndryshimi i pronësisë” të Ligjit nr. 8438, datë 28.12.1998 “Për tatimin mbi të ardhurat”, të ndryshuar, ai person juridik është përgjegjës dhe denohet si më poshtë:

1. për shkeljen në rastin e pikës 3 të nenit të sipërpërmendur, 15 (pesëmbëdhjetë) për qind të vlerës së tregut të aktiveve të trajtuara si me ndryshim pronësie;

Propozojmë:

Të rishikohet vlera 15 (pesëmbëdhjetë) për qind në ulje pasi e dëmton rëndë sipërmarrjen.

7.6 Neni 15

Në nenin 124 “Kundërvajtjet në lëshimin e faturave tatimore, dëftesave tatimore dhe dokumentimin e transaksioneve”, pas paragrafit të pikës 1 shtohet paragrafi i dytë me përmbajtjen si më poshtë:

“Nëse tatimpaguesi pranon vlerësimin tatimor dhe e paguan detyrimin, gjoba sipas paragrafit më lart të kësaj pike, zbritet me 30 (tridhjetë) për qind.”.

Propozojmë:

“Nëse tatimpaguesi pranon vlerësimin tatimor dhe e paguan detyrimin, gjoba sipas paragrafit më lart të kësaj pike, zbritet në 30 (tridhjetë) për qind.”

7.7 Neni 16

Në nenin 129 “Dënimet për tatimpaguesit, që janë banka apo institucione financiare”, në fund të shkronjës “ç”, shtohet fjalia me përmbajtjen si më poshtë:

“Në çdo rast, shuma e gjobës që zbatohet nuk mund të jetë më e madhe se shuma e kërkuar për t’u bllokuar”.

Propozojmë:

Në çdo rast, shuma e gjobës që zbatohet nuk mund të jetë më e madhe se shuma e kërkuar për t’u bllokuar” apo sipas rastit shuma që ka lëvizur nga llogaria.

8. Heqja e taksave doganore për artikujt që janë lëndë e parë për industrinë prodhuese

Bashkimi i Prodhuesve Shqiptarë dhe Shoqata e Siguruesve të Shqipërisë firmosën sot një Marrëveshje Bashkëpunimi me qëllim:

• Krijimin e kushteve të favorshme për zhvillimin e sektorëve prodhues dhe atij të sigurimeve;
• Shkëmbimin e përvojave profesionale në fushat respektive që kanë një interes të përbashkët, duke përfshirë këtu dhe trajnimet e përbashkëta me synim rritjen e kapaciteteve të burimeve njerëzore apo dhe ndërgjegjësimin e publikut për fushat respektive;
• Bashkëpunimin midis palëve me qëllim mbrojtjen e interesave të përbashkëta, apo përqafimin e praktikave më të mira ndërkombëtare, nëpërmjet paraqitjes së propozimeve konkrete apo dhe ngritjes së problematikave me interes të përbashkët pranë autoriteteve kompetente shtetërore. Duke patur në konsideratë fushën e veprimtarisë prodhuese, fokus i veçantë do t’i kushtohet shtrirjes së veprimtarisë siguruese në sektorë të tillë si prodhimi i lëndëve të para, bujqësia, turizmi, agropërpunimi, import-eksporti, etj.

Në kuadër të aktivitetit të zhvilluar ditën e djeshme datë 18 shtator 2018, me nismën e lëvizjes “RRNO për me gatue” që ka për qëllim të ruajë, ri-krijimin, zhvillimin dhe të promovimin e ushqimeve dhe kuzhinës shqiptare, në një kënd dedikuar rëndësisë së cilësisë së produkteve vendore dhe ushqimit të shëndetshëm, u zhvillua një aktivitet tjetër, ku të pranishëm ishin 30 fëmijë të shkollës “Fan Noli”, në Tiranë.

Ky aktivitet u organizua nga Bashkimi i Prodhuesve Shqiptarë dhe u mundësua me mbështetjen e organizatës ndërkombëtare “Food and Agriculture Organization” FAO në Shqipëri, qëllimi i së cilës ishte informimi i fëmijëve mbi rëndësinë e ushqimit të shëndetshëm, sigurisë së ushqimit, dhe edukimin e gjeneratë së re se si duhet të ushqehet.

Moderimi nga ana e asistentit të përfaqësuesit të “Food and Agriculture Organization” FAO, në Shqipëri, z. Arben Kipi, mbi rëndësinë dhe sigurinë e një ushqimi të shëndetshëm, si dhe pjesëmarrja interaktive e fëmijëve të pranishëm me pyetje-përgjigje, përcolli mesazhin dhe informacion e nevojshëm mbi rëndësinë e mënyrës së të ngrënit dhe jetës së shëndetshme.

[slider style=”flat” category=”FAO” orderby=”date” order=”ASC”]

Pazari i ri më datë 18 Shtator u “pushtua” nga 12 kuzhinerë shqiptarë nga Italia, Greqia, Belgjika, Mbretëria e Bashkuar, SHBA, Suedia dhe Danimarka, dhe nga shumë personazhe e personalitete vendase dhe media të huaja të sferës së kulinarisë, të cilët morën pjesë në eventin më të rëndësishëm të gastronomisë shqiptare “Kuzhina e Re Shqiptare”.

Ky event i organizuar nga “RRNO për me gatue” dhe “Bashkimi i Prodhuesve Shqiptarë”, me mbështetjen e Delegacionit të Bashkimit Europian në Shqipëri synonte të rrisë ndërgjegjësimin mes profesionistëve te kuzhinës dhe publikut dhe të promovonte ri-krijimin e kuzhinës shqiptare duke u bazuar në prodhimet lokale vendase.

Të rinj në moshë, idealistë e të lidhur fort me origjinën edhe pse i përkasin tre gjeneratave të ndryshme të emigracionit dhe diasporës, kthehen në Tiranë me një mision: të hedhin hapat e para të Kuzhines së Re Shqiptare, duke sjelle me vete eksperiencën nga restorante me famë ndërkombëtare dhe ikonat botërore të kulinarisë si Rene Rexhepin, Enrico Crippa dhe Gordon Ramsey.

Aktiviteti u përshendet nga Ministrja e Shtetit për Mbrojten e Sipërmarrjes znj. Sonila Qato, si dhe Kryetari i Bashkisë së Tiranës z. Erion Veliaj.

Të pranishëm në event ishin dhe anëtarë të Bashkimit të Prodhuesve Shqiptarë, të cilët dhanë kontributin e tyre në këtë aktivitet, si dhe promovuan produktet “Made in Albania” në sektorët e bujqësisë, blegtorisë, ushqimit, akuakulturë, përpunuesit e ujit të amballazhuar, pijeve joalkoolike.

[slider style=”Flat” category=”Kuzhina e Re Shqiptare” orderby=”date” order=”ASC”]

12 kuzhinerë shqiptarë nga Italia, Greqia, Belgjika, Mbreteria e Bashkuar, SHBA, Suedia dhe Danimarka mblidhen në Tiranë me 18 shtator 2018, Pazari i Ri, për të marrë pjesë ne eventin më të rëndësishëm të gastronomisë shqiptare.

Ky event i organizuar nga “RRNO për me gatue”, me mbështejten dhe partneritetin e “Bashkimit të Prodhuesve Shqiptarë”, do të shërbejë si një manifest kësaj lëvizjeje që ka për qëllim krijimin e Kuzhinës së Re Shqiptare.

Qëllimi i eventit: Shpalosja e thesareve gastronomike të fshehura të Shqipërisë/Prezantimi i metodologjive për ri-interpretimin e kuzhinës tradicionale.

Gjatë këtij eventi ne kemi për qëllim të mundësojme diskutimin, eksperimentimin, reflektimin dhe bashkëpunimin mes Chef-s të sapo afirmua të Shqipërisë. Gjithashtu duam të zbulojmë evoluimin e sistemeve të ushqimit në Shqipëri, historinë e tyre, si edhe impaktin social, gjeografik, ekonomik në kuzhinën shqiptare.

Ne besojmë se ky event mund të përfaqësojë një fillim të ri për kuzhinën shqiptare, të rrisë ndërgjegjësimin mes profesionistëve dhe publikut, të promovojë rijetëzimin e kuzhinës shqiptare duke u bazuar në prodhimin sezonal lokal dhe duke pëmirësuar ne këtë mënyrë industrinë e turizmit dhe të agrikulturës.

Një element tjetër i rëndësishëm i eventit tonë është përdorimi i produkteve lokale për recetat dhe pjatat tona. Për këtë qëllim është menduar edhe pjesëmarrja dhe prezantimi i prodhuesve lokalë për të paraqitur produktet e tyre. Eventi do të jetë tërësisht i dokumentuar si nga ana filmike dhe fotografike, por edhe me krijimin e një arkive të dokumentuar e cila do të shërbejë si bazë për trajnimet dhe promocionet në të ardhmen.

Situata dhe Konteksti

Izolimi dhe varfëria gjatë 45 viteve të komunizmit dhe reformat agrare të këtij sistemi pothuajse e shkatërruan traditën gastronomike të formuar ndër shekuj, duke shpërbërë ekosistemin e fermerëve të vegjël dhe prodhuesve artizanë. Po ashtu kuzhina shqiptare gjithmonë ka qenë e influencuar fuqishëm nga kulturat rrethuese kulinare saqë shpesh është konsideruar si një amalgam ku shkrihet kuzhina mesdhetare, ballkanike dhe ajo otomane.  Megjithatë kriza e vërtetë e identitetit e gastronimisë Shqiptare ndodhi gjatë periudhës post-komuniste dhe viteve të tranzicionit. Globalizimi, duke përfshirë edhe migrimin masiv dhe industrializimin kaotik të sistemeve të ushqimit përfaqëson aktualisht sfidën më të madhe të Gastronomisë Shqiptare.

Sfidat

Industria shqiptare e kulinarisë dhe kuzhinës po përballet me sfida të mëdha. Kuzhina tradicionale shqiptare në këtë moment përfaqëson më shumë një kuriozitet sesa të zërë peshën dhe vendin që i takon. Në këto memoment është një nevojë pothuajse emergjente për të dokumentuar dhe zhvilluar këto tradita para se të zhduken edhe burimet e fundit që kanë mbetur.

Përveç kësaj, Shqipëria po përballet me një sfidë të madhe në rekrutimin e personelit të duhur në industrinë e kulinarisë. Sistemi edukues nuk është në nivelet dhe standartet ndërkombëtare dhe shumica e shkollave të kuzhinës janë pothuajse të gjitha në pronësi private dhe shpesh të lidhura me interesa të ngushta komerciale.

Të rinjtë kanë nevojë për modele frymëzuese; atyre u duhet të provojnë dhe të vërtetojnë që talenti i tyre nevojitet ne Shqipëri, dhe që mund të kenë një të ardhme pa qenë nevoja të konsiderojnë  emigrimin.

Rinovimi i Kuzhinës Shqiptare

Shqipëria ka nevojë të Rinovojë kuzhinën e saj në një formë moderne por të bazuar tek traditat e vjetra, ashtu sikurse edhe kuzhinierët të tjerë po veprojnë në të gjithë botën; duke gjetur sërish rrënjët e kulinarisë dhe duke i rijetëzuar ato, dhe te bazuara te prodhimi sezonal dhe lokal. Ky është një trend global i cili kontribuon në ruajtjen dhe zhvillimin e trashëgimisë kulturore në një formë të qëndrueshme si një kundërpeshë e fuqishme kundrejt fuqisë mbizotëruese të globalizmit dhe ushqimit masiv të prodhuar në metodat industriale.

Në Shqipëri janë shfaqur personalitete të guzhinës të cilët po punojnë mbi këto shtylla filozofie, por ky komunitet është shumë i vogël dhe me burime tej mase të kufizuara. Me qëllim forcimin e këtij komuniteti dhe aftësimin për ta marrë përsipër këtë detyrë madhore, lind si nevojë angazhimi i elitave, kudo ku ato janë, si në Shqipëri ashtu edhe jashtë saj në mënyrë që të mundësohet arritja e këtij misioni bashkërisht.

Programi i Eventit 

Janë mbledhur një bazë të dhënash të recetave dhe pjatave tradicionale shqiptare, nga të cilat do të seleksionohen 12 nga më autentiket. Këto gatime do të prezantohen nga 12 kuzhinierë shqiptarë që jetojnë jashtë Shqipërisë dhe punojnë në restorante të mirënjohura në botë. Secili prej këtyre kuzhinierëve do të angazhohet në rijetëzimin dhe krijimin e një pjate tërësisht të re dhe moderne, por të bazuar në këtë gatim tradicional.

•  Gjatë eventit si pjata tradicionale ashtu edhe ajo e ri-krijuar do të prezantohen për një publik i cili kryesosht do të përbëhet nga të ftuar specialë dhe kuzhinerë të rinj e të talentuar shqiptarë.
• Gatimet tradicionale do të prezantohen nga 12 gjyshe të përzgjedhura si një vlerësim i rolit të tyre të pazëvendësueshëm në ruajtjen e kuzhinës tradicionale shqiptare.
• Pas çdo prezantimi të pjatave tradicionale çdonjëri prej kuzhinierëve të përzgjedhur do të demonstrojë teknikat dhe metodologjitë e përdorura për ri-krijimin e pjatës.
• Qëllimi kryesor i ri-krijimit të pjatës është të prezantohen teknikat moderne të gatimit, ndërsa ruhet në mënyrë strikte struktura dhe autenticiteti i pjatës tradicionale.

Bashkimi i Prodhuesve Shqiptare ka vijuar me zhvillimin e tryezave teknike ne lidhje me “Zhvlerësimin e monedhës së huaj dhe ndikimi tek prodhuesit-eksportuesit vendas”.

Prodhues/eksportues, ekspertë ekonomikë të pavarur janë bërë bashkë në këtë tryezë për të analizuar situatën, cilat janë shkaqet, pasojat dhe humbjet, cilat shoqëri po rrezikojnë më shumë nga kjo situatë e cila po i çon deri në falimentim të biznesit të tyre.

Tryezat teknike në lidhje me këtë problematikë do të vazhdojnë edhe në ditët në vazhdim deri sa Bashkimi i Prodhuesve Shqiptarë të dal me një qendrim zyrtar dhe për t’i kërkuar Qeverisë shqiptare ndërmarrjen e masave për stabilizimin e situatës.

[slider style=”flat” category=”Tryezë teknike sektoriale Zhvlerësimi i monedhës së huaj” orderby=”date” order=”ASC”]

Duke marrrë në konsideratë problematikat dhe shqetësimet që janë përcjellë nga shumë prej prodhuesve shqiptarë, në lidhje me ndikimin serioz të luhatjes së kursit të këmbimit të monedhës vendase dhe monedhave të huaja gjatë dy muajve të fundit, Bashkimi i Prodhuesve Shqiptare zhvilloi gjatë ditës së sotme një tryezë diskutimi me temë “Zhvlerësimi i monedhës së huaj dhe ndikimi tek prodhuesit-ekportuesit vendas”.

Të pranishëm në këtë takim ishin përfaqësues nga sektorë të ndryshëm të industrive prodhuese-ekportuese, si dhe ekspert nga fusha e ekonomisë dhe tregtisë. Përgjatë këtij takimi të pranishmit u shprehën mbi situatën në të cilën kompanitë e tyre ndodhen nga luhatjet e monedhës së huaj, si dhe rezultoi se kompanitë më të prekura janë kompanitë 100% “Made in Albania”, përfshirë këtu dhe lëndën e parë.

Bashkimi i Prodhuesve Shqiptarë, si një nga anëtarët themelues të “Innovation Hub”, mori pjesë në takimin që u zhvillua gjatë ditës së sotme, datë 2 maj 2018, me temë “Startup – Inovacioni – E ardhmja”, organizuar nga Agjencia Kombëtare e Shoqërisë së Informacionit, drejtuar nga znj. Mirlinda Karçanaj.

Në takimin joformal, ku u njoftua që brenda fundit të qershorit “Innovation Hub” do të vijë me një funksion dhe ambient krejt të ri, u fol kryesisht për nevojat e startup-eve në Shqipëri, hartimin e një plani efikas për veprimtarinë dhe përdorueshmërinë e qendrës, angazhimin e industrive prodhuese për të mbështetur start up-et dhe inovacionin, por edhe për nismat ligjore që janë duke u hartuar për t’i bërë startup-et shqiptare më të sigurta dhe më të qëndrueshme brenda dhe jashtë vendit.

Në aktivitet ishin të ftuar, z. Arben Shkodra, Sekretar i Përgjithshëm i Bashkimit të Prodhuesve Shqiptarë, znj. Vilma Tomço nga Autoriteti Kombëtar për Çertifikimin Elektronik dhe Sigurinë Kibernetike, drejtuesja e “Innovation Hub”, znj. Ada Ilia, përfaqësues të kompanive të suksesshme, si “Microsoft”, përfaqësues të startup-eve të konsoliduara në treg dhe të atyre që pritet të kenë impakt në të ardhmen.

Z. Shkodra bëri më dije se tashmë ka nisur hartimi i legjislacionit përkatës, duke përmendur se në shumë aspekte ekipet hartuese të nismës ligjore i janë referuar vendeve më të zhvilluara europiane. Ai prezantoi një pjesë të shkurtër të punës së bërë deri tani, ndërsa ftoi të pranishmit që të jepnin kontributin e tyre duke sugjeruar konkretisht propozime, për të cilat shprehu mbështetjen se do të shihen me përparësi për të qenë pjesë e pikave në projektligjin specifik.

Në fund të aktivitetit, të pranishmit hodhën ide dhe propozime për misionin e ri që duhet të ketë “Innovation Hub”, për funksiomin efikas koherent të tij, për mbështetje të vazhdueshme nga ana e institucioneve shtetërore etj.

[slider style=”flat” category=”Startup” orderby=”date” order=”ASC”]