Në emisionin “Tonight Ilva Tare”, zhvilluar mbrëmjen e djeshme datë 12 mars 2018, i ftuar ishte dhe z. Arben Shkodra, Sekretari i Përgjithshëm i Bashkimit të Prodhuesve Shqiptarë.
Në pyetjen që i bën z. Shkodra, (A i qajnë hallet aktualisht në një vend të caktuar, a janë kanalizuar problematikat, çfarë ka ndodhur, ka ndryshim?), ai u shpreh:
“Në fakt ishte përgjigja e thirrjes që ne i bëmë Qeverisë, nëse ju kujtohet kemi bërë një deklaratë publike, përpara se të bëheshin zgjedhjet dhe pas zgjedhjeve. Ne kërkuam që të kishte 3 propozime nga biznesi, megjithatë u përzgjodh ky model, pra që një ministër i sipërmarrjes të vinte nga biznesi, pikërisht për të kijuar këtë portën që nuk ishte gjetur asnjëherë. Bizneset ankoheshin, por edhe ligji për konsultim publik edhe ligji për informimin publik nuk respektoheshin shumë nga autoritete dhe për këtë arsye u krijua pikërisht ky model.
Mendoj që për momentin është model që na ka krijuar atë hapsirën që ne donim. Ne e themi edhe me Ministren që duhet parë deri në fund i gjithë modeli por për momentin ne kemi një derë ku të trokasim, ku të diskutojmë. Por për të të finalizuar çështjen nuk është më vetëm Ministria për Sipërmarrjen por duhet të kalojë në të gjithë hallkat e Qeverisë.
Në lidhje me problemin e energjisë elektrike, z. Shkodra u shpreh: Nëse flasim për energjinë elektrike, problemet me lidhjen vazhdojnë. Problem tjetër është cilësia që kemi me energjinë elektrike. Ne e kemi paraqitur dhe falënderojmë që e shtynë afatin për ta liberalizuar tregun e energjisë elektrike të furnizimit edhe për një vit tjetër sepse i thamë nuk jemi akoma gati. Pra si mund ta liberalizojmë tregun e energjisë elektrike pra furnizimin, kur ne nuk jemi gati me sistemin. Pra probleme ka patur dhe unë besoj që nëse nuk do të ketë së pari një plan shumë të mirë të kolauduar të OSHEE-së që ta ndajë dhe me biznesin, të kuptojnë bashkarisht se kush mund të jenë nevojat tona, se nevojat mund të jenë të mëdha. Nuk mund të kemi asnjëherë investime të zgjuara në energjinë elektrike dhe biznese të caktuara mezi po presin të miratohen akte nënligjore për energjinë e rinovueshme që janë panelet diellore sepse që të gjithë janë të bindur që duke qenë autonom atëherë ato kanë më shumë mundësi për të suksesuar.
Çështje tjetër e renditur te “Doing Business”, janë taksat:
A.Shkodra: Realisht biznesi nuk po pret të ulen taksat por po pret një konsolidim fiskal të filozofisë. Ka ardhur koha që ne të kemi një pakt kombëtar për ekonominë, 1. Aspekti fiskal, i cili të paktën për një afat 5 vjeçar mos të ndryshojë. Kush është arsyeja? Një biznesmen bënë një plan biznesi që minimalisht është 7-vjeçar, maksimalisht është 15-vjeçar dhe normalisht nuk mund të ketë këto fluktacione qoft të shifrave dhe procedurave. Ne themi gjithmonë kemi arnuar në njëzet e ca vite procedurat tatimore. Çdo vit ne ulemi dhe i arnojmë, dhe nuk e dimë më se cili ka qenë version origjinal i saj. A ka ardhur koha që ta kemi të konsoliduar përfundimisht këtë procedurë tatimore e cila eshtë bërë mankth si për inspektorët dhe për tatim paguesit. 2. Unë nuk mendoj që mund të fiksojmë një vlerë që tatimi do jetë kaq për 5 vite, sepse ne e dimë shumë mirë që janë filozofi të ndryshme të partive të ndryshme që duan të vinë, por të paktën të kemi një marzh që smund të ndryshojë shumë.
Për t’iu rikthyer problem të tatimeve ose të taksave në lidhje me Doing Business, normalisht që Doing Business është referencë, problem kryesor ndoshta aty ka dal rimbursimi dhe kjo lidhet kam përshtypjen dhe me situatën që lidhet me rimbursimet për TAP-in, janë investime shumë të mëdhaja që kërkojnë rimbursime shumë të mëdha, ashtu siç i japin ashtu dhe i kërkojnë. Por nga ana tjetër ministria e ekonomisë dhe financave duhet të fiksojë një gjë. Nëse ka interesa debitore ndaj sipërmarrësit, ndaj tatimpaguesit, pra kur tatimpaguesi nuk e paguan tatimin në kohë dhe fillojnë interesat negative, debitore, ashtu duhet të ketë dhe interesa kreditore që kur nuk rimbursohet TVSH-ja duhet të kontabilizohen dhe këto. Duhet të fusim patjetër elementin e kompensimit.
Kush ka më shumë proleme, bizneset e mëdha, të vogla, apo nuk ka dallim të gjithë janë?
Z. Shkodra: Një nga diskutimet që ne kemi patur me Ministren është që nganjëherë tendenca për të përfunduar për zgjidhjen e halleve dhe problemeve shumë të vogla, mund t’i marrë më shumë kohë dhe energji, ndërkohë që duhet të punojmë më fort për të ndërtuar sisteme. Nëse ne ndërtojmë sisteme, unë besoj që dhe ato probleme të vogla fillojnë të zgjidhen për shkak të sistemit.
Bizneset e mëdhaja kanë veprimtari më të madhe, dhe ndoshta nuk kanë shumë halle apo shume volum, por kur e kanë, e kanë akut, e kanë më të rëndësishëm, që do të thotë e kanë me një vlerë dëmi shumë herë më të madh, e kanë me një impakt social shumë herë ndoshta më të madh. Kështu që unë besoj se Ministrja duhet të fokusohet shumë herë më tepër, në përcjelljen e problematikave që ne shprehim. Duhet të fokusohemi më shumë te sistemi. Ne e duam fokusin e ministres për sipërmarrjen që të pranojë propozimet tona, të ulemi në konsultim dhe të përcjelli pikërisht këto gjëra, pra sistemet që ne duhet të ndërtojmë.
