Blog

Rriten çmimet e produkteve, si pasojë inflacioni i afrohet objektivit të Bankës së Shqipërisë 3%

Inflacioni arrin në 2.1%  në muajin maj, ndërsa një vit më parë kjo shifër ishte 2.0%.  Ky muaj shënon dhe shifrën më të lartë të arritur që nga muaji qershor në vitin 2013, duke iu afruar objektivit të Bankës së Shqipërisë 3%.

Rritja vjetore e çmimeve në muajin maj është ndikuar kryesisht nga grupi “Ushqime dhe pije joalkoolike” me +1,10 pikë përqindje .

Më pas vijojnë grupet:

  • Çmimet e grupit “Qira, ujë, lëndë djegëse dhe energji” kanë kontribuar me +0,55 pikë përqindje.
  • Çmimet e grupit “Transporti” kanë kontribuar me +0,13 pikë përqindje.
  • Çmimet e grupit “Argëtim dhe kulturë” kanë kontribuar me +0,09 pikë përqindje.
  • Çmimet e grupit “Veshje dhe këpucë” kanë kontribuar me +0,08 pikë përqindje
  • Çmimet e grupit “Pije alkoolike dhe duhan” kanë kontribuar me +0,06 pikë përqindje
  • Çmimet e grupit “Hotele, kafene dhe restorante” kanë kontribuar me +0,03 pikë përqindje.
  • Çmimet e grupeve “Komunikimi”, “Shërbimi arsimor” dhe “Mallra dhe shërbime të ndryshme” kanë kontribuar me +0,02 pikë përqindje secili.
  • Çmimet e grupit “Shëndeti” kanë kontribuar me +0,01 pikë përqindje.

Për më shumë informacion klik këtu

Read more

Mundësi bashkëpunimi, bëhu pjesë e Panairit Ndërkombëtar të Drurit në Austri

Më datë 30 gusht 2018, në Klagenfurt, Austri, do të organizohet Panairi Ndërkombëtar i Drurit.  Ky panair organizohet nga Dhoma e Ekonomisë në Carinthia, Austri, në bashkëpunim me Rrjetin e Dhomave të reja Alpe Drita si dhe me rrejtin Europian të Ndërrmarjeve.

Kompanitë pjesëmarrëse janë prej rajonit të Evropës Qëndrore, rajoni Alpe-Adria dhe përfaqësues nga autoritet publike në sektorin e ndërtimit të drurit dhe pylltarisë.

Panairi  është i një rëndësie të veçantë, pasi jepen mundësi që kompanitë pjesëmarrëse të krijojnë njohje dhe kontakte bashkëpunimi mes tyre. Kompanitë që do të marrin pjesë do të kenë përfitime të shumta në njohurinë e fushave të drurit dhe mjeteve të pylltarisë, në teknikat e prerjes së drurit, teknikat e përdorimit të sharrave, matja e drurit dhe IT, shëndeti në punë, siguria dhe parandalimi i aksidenteve. Gjithashtu edhe bioenergjia, transporti dhe logjistika.

Pjesëmarrja në këtë event është falas dhe e hapur për të gjithë, me një fokus të vecantë për SME-të.

Për kompanitë që janë të interesuara të marrin pjesë, lutemi klikoni në linkun https://woodfair2018.b2match.io/

Read more

Ekspozita ndërkombëtare “Modexpo 2018”, 15-18 nëntor 2018

Më datat 15-18 nëntor 2018, në Bukuresht, Rumani, do të mbahet edicioni i 26-të i Modexpo.

Modexpo 2018 është ekspozita ndërkombëtare e tekstileve, e rrobave të gatshme, artikujve prej lëkure, gëzofi, këpucëve dhe pajisjeve të industrisë së lehtë. Kjo eshtë një ekspozitë B2B dhe B2C e dedikuar për specialistë dhe audiencë të madhe profesionistësh. Modexpo synon të bëhet një nga ngjarjet më të rëndësishme në industrinë tekstile të Rumanisë, që përfaqëson platformën ideale për të nisur dhe shitur prodhime të reja, për të zhvilluar marrëdhënie të reja biznesi dhe për të nënshkruar kontrata. Ky event ka si qëllim të mbështesë kompanitë që aktivizohen në industrinë e lehtë, duke lehtësuar qasjen në tregjet e reja.

Pjesëmarrësit në Modexpo do të jenë: prodhues të industrisë së lehtë, importues, eksportues, projektues, shpërndarës, tregtarë, specialistë, si dhe audienca e përgjithshme.

Për më shumë mbi sektorët e ekspozitës dhe për të qënë pjesë e eventit vizitoni linkun: http://www.modexpo.ro/en/

Read more

Indeksi i Çmimeve të Prodhimit, rriten me 1% në tremujorin e parë krahasuar me një vit më parë

Sipas të dhënave zyrtare nga INSTAT, në tremujorin e parë të vitit 2018, indeksi i çmimeve të prodhimit arriti 103,3, duke u rritur me 1,0 %, në krahasim me tremujorin e parë 2017.

Ndryshimi vjetor i indeksit të çmimeve të prodhimit

Rritjen më të madhe e kanë shënuar çmimet e prodhimit në seksionin “Industri nxjerrëse” me 4,5 %. Brenda kësaj industrie vihet re rritja e çmimeve të prodhimit të produkteve në nxjerrjen e naftës bruto dhe gazit natyror me 8,0 %.

Në tremujorin e parë 2018, çmimet e prodhimit në aktivitetet e “Industrisë përpunuese” kanë shënuar ulje me 0,5 %, krahasuar me tremujorin e parë 2017. Ndikimin kryesor në këtë ulje e kanë dhënë çmimet e prodhimit të produkteve në aktivitetin e “Përpunimi i produkteve ushqimore” me 1,8 %, “Prodhimi i produkteve metalikë të fabrikuar, përveç makinerive dhe pajisjeve” me 1,2 % dhe “Metalurgjia” me 0,4 %.

Indeksi i çmimeve të prodhimit për produktet vendase arriti 101,0, duke u rritur me 0,7 %, krahasuar me tremujorin e parë të vitit 2017.

Indeksi i çmimeve të eksportit arriti 107,3, duke u rritur me 1,0 %, krahasuar më të njëjtën periudhë të vitit të mëparshëm.

Ndryshimi tremujor i indeksit të çmimeve të prodhimit

Indeksi i çmimeve të prodhimit, në tremujorin e parë 2018, shënoi rritje me 0,5 %, krahasuar me tremujorin e katërt 2017. Çmimet e prodhimit, në seksionin ”Industri Nxjerrëse” shënuan rritje me 2,6 %, krahasuar me tremujorin e katërt 2017. Çmimet e prodhimit në aktivitetin “Nxjerrja e naftës bruto dhe gazit natyror” janë rritur me 4,7 %. Çmimet e prodhimit në seksionin “Industri përpunuese” ka shënuar ulje me 0,8 %, krahasuar me tremujorin e mëparshëm. Ndikimin kryesor në këtë ulje e kanë dhënë çmimet e prodhimit të produkteve në aktivitetin e “Përpunimi i produkteve ushqimore” me 0,5 %, “Prodhimi i produkteve minerale jo-metalike” me 1,2 % dhe “Metalurgjia” me 2,9 %.

Krahasuar me tremujorin e katërt të vitit 2017, indeksi i çmimeve të prodhimit për produktet vendase ka shënuar rritje me 0,8 %. Në këtë rritje ndikim kryesor ka dhënë rritja e çmimeve të prodhimit të produkteve në seksionin “Energjia elektrike, gaz, avull dhe ajër i kondicionuar” me 1,3 % dhe “Industri Nxjerrëse” me 2,8 %. Çmimet e prodhimit të produkteve për eksport kanë shënuar ulje me 0,2 %, krahasuar me tremujorin e mëparshëm. Ndikimin kryesor në këtë ulje e kanë dhënë çmimet e prodhimit të produkteve në seksionin “Industri Përpunuese” me 1,2 %.

Për më shumë informacion klikoni këtu

Read more

Tryezë teknike sektoriale “Zhvlerësimi i monedhës së huaj dhe ndikimi tek prodhuesit-eksportuesit vendas”

Bashkimi i Prodhuesve Shqiptare ka vijuar me zhvillimin e tryezave teknike ne lidhje me “Zhvlerësimin e monedhës së huaj dhe ndikimi tek prodhuesit-eksportuesit vendas”.

Prodhues/eksportues, ekspertë ekonomikë të pavarur janë bërë bashkë në këtë tryezë për të analizuar situatën, cilat janë shkaqet, pasojat dhe humbjet, cilat shoqëri po rrezikojnë më shumë nga kjo situatë e cila po i çon deri në falimentim të biznesit të tyre.

Tryezat teknike në lidhje me këtë problematikë do të vazhdojnë edhe në ditët në vazhdim deri sa Bashkimi i Prodhuesve Shqiptarë të dal me një qendrim zyrtar dhe për t’i kërkuar Qeverisë shqiptare ndërmarrjen e masave për stabilizimin e situatës.

[slider style=”flat” category=”Tryezë teknike sektoriale Zhvlerësimi i monedhës së huaj” orderby=”date” order=”ASC”]

 

Read more

Mbi detyrimin e subjekteve për të llogaritur, deklaruar dhe paguar Tatimin në Burim

Sipas njoftimit zyrtar, Drejtoria e Përgjithshme e Tatimeve i bën thirrje të gjithë subjekteve (individë apo subjekte tregtare) se duhet të llogarisin, deklarojnë dhe paguajnë Tatimin në Burim për të gjitha të ardhurat e realizuara me burim në Republikën e Shqipërisë dhe jashtë saj, të cilat janë objekt i tatimit, sipas legjislacionit tatimor, duke përmbushur kështu detyrimin që ju lind atyre për të bërë pagesa për të ardhurat e realizuara.

Në zbatim të ligjit nr.8438 datë 28.121998 “Për Tatimin mbi të Ardhurat” nenet 8, 9, këto të ardhura janë të tatueshme me shkallë tatimore 15%.

Sipas pikës 2.6.4, të Udhëzimit të Ministrit të Financave, për të ardhura të paguara nga persona, të cilët nuk mund të bëjnë mbajtjen e tatimit në burim për llogari të organeve tatimore shqiptare, individi përfitues i të ardhurave është i detyruar të deklarojë dhe të paguajë në organin tatimor përkatës tatimin në masën 15% të të ardhurave të realizuara, jo më vonë se data 20 e muajit që pason muajin në të cilin është kryer pagesa.

Deklarimi dhe pagesa mund të kryhen online, përmes faqes zyrtare, por më parë është e nevojshme që individi përfitues të paraqitet pranë zyrës se Shërbimit të Tatimpaguesve, pranë Drejtorisë Rajonale Tatimore përkatëse, për t’u regjistruar për përgjegjësinë tatimore të Tatimit në Burim, si dhe për t’u pajisur me fjalëkalimin për hyrjen në llogarinë e tij, në sistemin e deklarimit elektronik.

Individi, përfitues i të ardhurave, duhet të dorëzojë brenda dates 20 të çdo muaji deklaratën e Tatimit në Burim, që përmban informacionin e nevojshëm mujor për të llogaritur detyrimin tatimor.

Deklarimi kryhet vetëm elektonikisht dhe për këtë duhet të ndqini hapat e mëposhtëm:

  •  Hapet faqja zyrtare e administratës tatimore: www.tatime.gov.al;
  • Në menynë “e-Shërbime” zgjidhet rubrika “individët”, në të cilën klikohet për të aksesuar llogarinë e deklarimit elektronik;
  • Hapet dritarja e aksesimit në llogari, ku si emër përdoruesi vendoset numri personal (sipas Kartës së Identitetit dhe jepet fjalëkalimi përkatës);
  • Për të aksesuar llogarinë, duhet të zgjidhet: “E lexova dhe bie dakord me termat dhe kushtet”;
  • Me hyrjen në llogari, në menynë “Deklarata” zgjidhet “Tatimi në Burim”;
  • Tek rubrika “Deklarata të padorëzuara” listohen deklaratat, që duhet të plotësohen;
  • Zgjidhet periudha për të cilën do të kryhet deklarimi.

Individi përfitues i të ardhurave, plotëson rubrikën 15 “Pagesat për qiratë” të deklaratës së tatimit të mbajtur në burim, duke hedhur shumën mujore të përfituar nga qiratë dhe tatimin e llogaritur në masën 15%.

Duke klikuar butonin “Dorëzo”, deklarimi përfundon dhe dorëzohet në Administratën Tatimore.

Pas dorëzimit, deklarata mund të printohet për efekt dokumenti, duke klikuar butonin “Printo”.

Për kryerjen e pagesës, individi, përfitues i të ardhurave, në menynë “Deklarata të dorëzuara”, zgjedh periudhën përkatëse dhe shtyp butonin “Printo Urdhër Pagesë”. Ky urdhër i printuar shërben për të kryer pagesën në sportelet e bankave të nicvelit të dytë.

 

Read more

“Food for Change – Salone del Gusto 2018”, Torino, Itali – Takime B2B

Më datat 20-22 shtator 2018, në Torino, Itali, Dhoma e Tregtisë, Industrisë, Artizanatit dhe Agrikulturës e Torinos do të organizojnë aktivitetin “Food for Change B2B, Salone del Gusto 2018”. Në këtë aktivitet synohet të sillen kompani nga vende të ndryshme të botës, për të gjetur partnerë të rinj ndërkombëtar.

Sektorët në fokus të këtij aktiviteti janë:

  • Prodhimi i qëndrueshëm;
  • Bioekonomia;
  • Shëndeti: bio kontrolli, proceset organike, higjiena, ushqimi funksional;
  • Zinxhiri i vlerave digjitale;
  • Bujqësia;
  • Dizajni ushqimor.

Në datën 20 shtator do të zhvillohet eventi “Technological Brokerage” i cili është i hapur për kompanitë, universitetet, institutet R&D që kërkojnë/ofrojnë teknologji të reja në sektorin agroushqimor dhe/ose partnerët për projektet e BE.

Në datat 21 shtator (ditë e plotë) dhe 22 shtator (në mëngjes) do të zhvillohen takime B2B ndërmjet të gjitha kompanive pjesëmarrëse operuese në këtë sektor.

Kompanitë shqiptare të interesuara për të qënë pjesë e eventit mund të regjistrohen në linkun https://gusto2018.b2match.io/

 

Read more

“Një ditë shqiptare në Tokio”, 4 qershor 2018

Më datë 4 Qershor 2018, në Tokio, Japoni, do të zhvillohet aktiviteti “Një ditë shqiptare në Tokio”. Në këte aktivtete do të marrin pjesë përfaqësues nga Ministria për Evropën dhe Punët e Jashmte të shoqëruar nga një delegacion biznesi.

Nëpërmjet këtij aktiviteti synohet të prezantohen fushat e veprimtarisë së bizneseve shqiptare në tregun Japonez. Rajoni i Evropës Juglindore është një hap i rëndësishëm në ambiciet e Japonisë për të arritur një pozitë udhëheqëse në Azi dhe ky aktivitet është një mundësi shumë e mirë për të shfaqur potencialet e vendit tonë duke promovuar sipërmarrjet shqiptare dhe produktet “Made in Albania”.

Anëtarë të Bashkimit të Prodhuesve Shqiptarë që do të marrin pjesë në këtë aktivitet, do të jenë të pranishëm me stendat e tyrë me produkte shqiptarë.

 

Read more

Tryezë diskutimi “Zhvlerësimi i monedhës së huaj dhe ndikimi tek prodhuesit-ekportuesit vendas”

Duke marrrë në konsideratë problematikat dhe shqetësimet që janë përcjellë nga shumë prej prodhuesve shqiptarë, në lidhje me ndikimin serioz të luhatjes së kursit të këmbimit të monedhës vendase dhe monedhave të huaja gjatë dy muajve të fundit, Bashkimi i Prodhuesve Shqiptare zhvilloi gjatë ditës së sotme një tryezë diskutimi me temë “Zhvlerësimi i monedhës së huaj dhe ndikimi tek prodhuesit-ekportuesit vendas”.

Të pranishëm në këtë takim ishin përfaqësues nga sektorë të ndryshëm të industrive prodhuese-ekportuese, si dhe ekspert nga fusha e ekonomisë dhe tregtisë. Përgjatë këtij takimi të pranishmit u shprehën mbi situatën në të cilën kompanitë e tyre ndodhen nga luhatjet e monedhës së huaj, si dhe rezultoi se kompanitë më të prekura janë kompanitë 100% “Made in Albania”, përfshirë këtu dhe lëndën e parë.

Në përfundim të këtij takimi u vendos që Bashkimi i Prodhuesve Shqiptarë, gjatë këtyrë ditëve do të analizojë të gjithë situatën me ekspert të fushës, ku do të peshohen efektet dhe ndikimin që ka ky fenomen mbi prodhuesit vendas, si dhe do të dal me një qëndrim për t’i kërkuar Qeverisë shqiptare ndërmarrjen e masave për stabilizimin e situatës.

[slider style=”flat” category=”Zhvlerësimi i monedhës së huaj” orderby=”date” order=”ASC”]

Read more

Startup Live Tirana #7

Startup Live Tirana startoi për të shtatin vit rradhazi edicionin e rradhës pranë ambjenteve të Fondacionit Ivanaj, ku pjesë e anëtarëve të jurisë ishte dhe Sekretari i Përgjithshëm i Bashkimit të Prodhuesve Shqiptarë, z. Arben Shkodra.

Për një fundjavë të plotë, më shumë se 60 të rinj nga Tirana, por edhe nga qytete të tjera të Shqipërisë, patën mundësi të prezantojnë dhe zhvillojnë idetë e tyre të biznesit.Aktivitetit nisi ditën e premte në datë 18 maj me prezantimin e moderatorit dhe përfaqësuesit të Startup Live Europe, Georg Kuttner i cili bëri një shpjegim të shkurtër për pjesëmarrësit dhe të ftuarit në lidhje me konceptin e Startup Live, si krijohet një ide biznesi dhe çfarë duhet bërë për ta kthyer atë në një ide të qëndrueshme.

Pjesëmarrësit u njohën me një nga rregullat më të famshme të eventeve në formatin Startup: prezantimi i idesë në një kohë mjaft të shkurtër prej 90 sekondash. Më pas, pjesëmarrësit u njohën me idetë e ndryshme dhe krijuan grupet e tyre duke u ndarë sipas preferencave. Idetë u paraqitën vizualisht në mënyrë që çdo pjesëmarrës të kishte mundësinë të konsultohej dhe të bënte një vlerësim. Shumë grupe ishin të krijuara përpara nisjes së eventit, por kishte edhe nga ata të cilët ishin në kërkim të anëtarëve të rinj. Pas njohjes me idetë e prezantuara, një tjetër sfidë ishte edhe e ashtuquajtura Mashmalloë Challenge e cila vendos në lëvizje shpirtin e grupit dhe punën në skuadër ku shfaqen tipare të ndryshme të karakterit të gjithsecilit në nxitjen dhe vullnetin për ta çuar lojën deri në fund.

Dita e dytë i përket më së shumti fazës së mentorimit, por para kësaj pjesëmarrësit ndoqën një fjalim inspirues nga moderatori i cili prezantoi ata me mënyrën se si duhet të zhvillohet një startup, cili është qëllimi kryesor dhe ku duhet të fokusohet më shumë një grup gjatë ndërtimit të startupit. Thelbi i prezantimit ishte si të gjendet një ide e cila nuk është thjesht një ide e bukur dhe inovative, por edhe zgjidh një problem konkret. Grupet u njohën me disa nga metodat që përdoren në vende të ndryshme të Evropës për ndërtimin e një plani biznesi ku duke u bazuar në këto modele ata ndërtuan dhe hodhën në letër hapat e parë të krijimit të startupeve të tyre.

Në ditën e tretë të këtij aktiviteti, fokus u vendos në prezantimin e idesë dhe se sa e rëndësishme është mënyra se si komunikohet kjo ide, çfarë duhet dhe çfarë nuk duhet të thuhet gjatë prezantimit dhe çfarë ka nevojë audienca të dëgjojë. Prezantimi duhet të jetë sa më i thjeshtë dhe tërheqës duke dhënë mesazhin në mënyrë të qartë.

Ndërkohë juria e përbërë nga figura të rëndësishme të jetës së biznesit e arsimit, pati mundësinë të njihej me 18 ide finale. Pas prezantimit të ideve dhe diskutimit të gjatë mes anëtarëve të jurisë, u shpallën idetë fituese ku ideja që zuri vendin e parë kishte të bënte me krijimin e lojërave fizike për fëmijë duke integruar pjesë robotike në mënyrë që të nxitej programimi dhe kodimi tek fëmijët.

Vendi i dytë u fitua nga një grup të rinjsh nga qyteti i Lezhës të cilët kishin krijuar syze inteligjente që u vijnë në ndihmë personave që nuk shikojnë. Ideja e tyre ishte në fazë zhvillimi të prototipit dhe vendi i dytë i siguroi tre muaj akselerim nga Yunus Social Business.

Vendi i tretë u rendit ideja Neë Life Propositions me të cilën dy djem nga Tirana synojnë të krijojnë një komunitet të moshuarish të cilët jetojnë vetëm duke i bashkuar ata në hapësira ku mund të jetojnë së bashku dhe në këtë mënyrë mund të përfitojnë të ardhura duke lëshuar me qera shtëpitë e tyre.

[slider style=”flat” category=”Startup Live Tirana #7″ orderby=”date” order=”ASC”]

 

Read more

Në vitin 2016, një grup shoqërish prodhuese më në zë në territorin e Shqipërisë iniciuan themelimin e një entiteti të vetëm për t’i ardhur në ndihmë industrisë prodhuese vendase.

Rreth Nesh

All Rights Reserved © 2026 Bashkimi i Prodhuesve Shqiptarë.