Blog

Në faqen zyrtare të Tatimeve në rubrikën “Tatimet Këshillojnë” është publikuar informacion për Borxhin Tatimor.

Kush konsiderohet borxh tatimor?

– Detyrimi tatimor i vetdeklaruar nga tatimpaguesi dhe i papaguar brenda afatit ligjor.
– Detyrimi tatimor i vlerësuar nga administrata tatimore në përfundim të një kontrolli tatimor, verifikimi apo çdo proçedure tjetër ligjore, i papaguar brenda afatit ligjor.

Çfarë ndodh nëse nuk paguhet borxhi tatimor?

Nëse brenda 10 ditësh nga data e marrjes së njoftimit për pagesë të detyrimeve tatimore, tatimpaguesi vazhdon të mos paguajë borxhin tatimor, ndaj tij fillojnë masat ligjore të mbledhjes me forcë.

Cilat janë masat e mbledhjes me forcë të borxhit tatimor?

Hapi I-rë: Urdhër bllokimi i llogarive bankare, ku i kërkohet çdo banke ku tatimpaguesi ka llogaritë e tij të mbajë shumën e detyrimit të papaguar.
Hapi II-të: Barrë sigurie dhe/ose Barrë hipotekore mbi pasuritë 10 ditë pas lëshimit të urdhër bllokimit bankar në rast se nuk është arritur arkëtimi i detyrimit.
Hapi III-të: Urdhër për sekuestrim të pasurive të luajtshme dhe të paluajtshme në rast se detyrimi nuk është arkëtuar brenda 30 ditëve nga data e vendosjes së barrës së sigurisë dhe/ose hipotekore. Hapi IV-t: Konfiskimi i pasurisë nga adminisitrata tatimore në rast se detyrimi nuk është arkëtuar brenda 15 ditëve nga sekuestrimi i pasurisë.

A mund të ankimohet vendosja e masave të sigurisë?

Tatimpaguesi, ndaj pasurisë së të cilit ka dalë një vendim për vendosjen e masave të sigurisë qoftë në fomën e barrës së sigurisë apo barrës hipotekore, në rastet kur pretendohet se zbatimi i tyre nuk është ekzekutuar në mënyrë të rregullt, ka të drejtë të paraqesë ankesë pranë Drejtorisë Rajonale Tatimore.

Afati, kushtet dhe detyrimet për të cilat lidhet marrëveshja me këste

Marrëveshja me këste nuk mund të zgjatet përtej fundit të vitit që pason vitin në të cilin ajo është lidhur. Kur lidhet marrëveshjeve për pagesë me këste, tatimpaguesi paguan kamatëvonesat, por nuk llogaritet gjobë për pagesë të vonuar. Marrëveshja për pagesë me këste nuk mund të lidhet për detyrimin tatimor të vetëdeklaruar nga tatimpaguesi, i cili është llogaritur, ose mbledhur, ose mbajtur prej tij, përfshirë kontributet e sigurimeve shoqërore dhe shëndetësore.

Hapat që duhen ndjekur për të nënshkruar një marrëveshje me këste:

Hapi I-rë: Kërkesë me shkrim drejtuar Drejtorisë Rajonale Tatimore nën juridiksionin e të cilës është regjistruar, ku të shpjegohet rrethanat dhe arsyet pse kërkohet të lidhet një marrëveshje për pagesë me këste.
Hapi II-të: Drejtoria Rajonale Tatimore brenda 10 ditëve njofton nëse kërkesa pranohet apo refuzohet.
Hapi III-të: Nëse kërkesa pranohet, nënshkruhet marrëveshja për pagesë me këste të detyrimeve tatimore të papaguara. Kjo marrëveshje nënshkruhet nga tatimpaguesi dhe nga drejtori i drejtorisë rajonale të tatimeve ose drejtuesi i njësisë së ngjashme me të vetëm nëse tatimpaguesi paguan menjëherë 20% të vlerës së detyrimit, për të cilin lidhet marrëveshja e pagesës me këste.

A publikohet lista e debitorëve?

Administrata Tatimore publikon në faqen zyrtare të saj listën e plotë të tatimpaguesve me masë sigurie dhe hipotekore si dhe listën e tatimpaguesve, shoqërive tregtare për të cilët Administrata Tatimore ka kërkuar fillimin e procedurave të falimentimit që kryhet në përputhje me ligjin për falimentin.

Materialin origjinal te publikuar në faqen e Drejtorisë së Përgjithshme të Tatimeve mund ta gjeni këtu.

Sipas të dhënave zyrtare të INSTAT, Indeksi i Çmimeve të Konsumit në muajin Tetor 2017, arriti 103,1 kundrejt muajit Dhjetor 2015.

Ndikimi i grupeve kryesore në ndryshimin vjetor të indeksit të çmimeve të konsumit.

Rritja vjetore e çmimeve në muajin Tetor është ndikuar kryesisht nga grupi:

• “Ushqime dhe pije joalkoolike” me +1,53 pikë përqindje;
• “Qira, ujë, lëndë djegëse dhe energji” kanë kontribuar me +0,23 pikë përqindje;
• “Argëtim e kulturë” kanë kontribuar me +0,06 pikë përqindje;
• “Transporti” dhe “Shërbimi arsimor” kanë kontribuar me +0,03 pikë përqindje secili;
• “Pije alkoolike dhe duhan” kanë kontribuar me +0,02 pikë përqindje;
• “Mallra dhe shërbime të ndryshme” kanë kontribuar me +0,01 pikë përqindje;
• “Veshje dhe këpucë” kanë kontribuar me -0,02 pikë përqindje;
• “Mobilje, paisje shtëpie dhe mirëmbajtje” kanë kontribuar me -0,01 pikë përqindje.
• Ndryshimi mujor i indeksit është + 0,04 %.

  Krahasuar me muajin Shtator 2017 rritja më e madhe e çmimeve vërehet në grupet “Veshje dhe këpucë” me 1,6 %, pasuar nga grupi “Argëtim dhe kulturë” me 0,8 %, “Shërbim arsimor” me 0,3 %, etj.

  Ulja më e madhe e çmimeve vërehet në grupet “Transporti” me 0,3 %, pasuar nga “Ushqime dhe pije joalkoolike” me 0,1 %.

  Për më shumë informacion klikoni këtu

Në një njoftim zyrtar Drejtoria e Përgjithshme e Tatimeve paralajmëron tatimpaguesit të kenë kujdes kur kryejnë transaksione. Nga mbikëqyrja që Administrata Tatimore u ka bërë të dhënave lidhur me transaksionet e kryera midis tatimpaguesve rezultojnë raste kur tatimpagues me status aktiv realizojnë transaksione, në adresë të tatimpaguesve, persona fizikë, që janë me status pasiv.

Konkretisht nga kontrolli i të dhënave në Drejtorinë e Tatimpaguesve të Mëdhenj, rezulton që për vitin 2017, tatimpagues të klasifikuar si të mëdhenj, kanë faturuar rreth 11 mijë transaksione, në adresë të tatimpaguesve, persona fizikë, që janë me status pasiv. Administrata tatimore, është duke e shtrirë këtë verifikim edhe tek drejtori të tjera rajonale tatimore. Çdo transaksion i kryer nga tatimpaguesit, persona fizikë apo juridikë, tregtarë, që janë në regjistrin pasiv, konsiderohet shkelje administrative dhe dënohet në përputhje me ligjin.

Për çdo rast që nga furnizuesit është shënuar fiktivisht NIPT-i i blerësit, realisht me status pasiv, ndaj lëshuesit të faturës tatimore do të aplikohet dënim administrativ.

Nëse tatimpaguesi me status pasiv, ka kryer aktivitet, ndaj tij administata tatimore, përveç dënimit administrativ, do të kryejë edhe vlerësim tatimor për të gjithë periudhën që ai ka qenë në regjistrin pasiv. Shkelje të përsëritura të kësaj natyre, bazuar në nenin 116, pika 1 të ligjit të procedurave tatimore do të konsiderohen si evazion tatimor si dhe vepër penale bazuar në nenin 131 të ligjit procedurial.

Transferimi i tatimpaguesit nga regjistri aktiv në regjistrin pasiv, mundësohet, në rast se përmbushet, të paktën, një nga kushtet e mëposhtme:

a) nuk ushtron më veprimtari tregtare për një periudhë tatimore prej 12 muajsh të njëpasnjëshëm;
b) nuk dorëzon deklaratën tatimore për një periudhë tatimore prej 12 muajsh të njëpasnjëshëm;
c) deklaron në QKB pezullim veprimtarie tregtare dhe kjo e fundit e ka miratuar pezullimin, i cili i është njoftuar edhe administratës tatimore.

Në faqen zyrtare të Drejtorisë së Përgjithshme të Tatimeve, mund të konsultoni listën e përditësuar të tatimpaguesve që janë në regjistrin pasiv.

Më datat 4 deri më 6 Dhjetor 2017, në Dubrovnik, Kroaci, do të zhvillohet edicioni i 3-të i Ditëve të Drurit të Adriatikut. Përgjatë këtyre 3 ditëve të zhvillimi të kësaj konference sektoriale në Mesdhe do të bëhen bashkë një numër ekspertësh, krijues të rëndësishëm të politikave dhe aktorë të tjerë relevantë nga biznesi, akademia, media, etj, të cilat përmes 4 konferencave dhe 3 ëorkshopeve do të diskutojnë tema që lidhen me:

• mobilimi i hoteleve dhe dizajni i produktit
• përdorimi më i madh i drurit në ndërtim
• menaxhimi i pyjeve në ishuj
• tregtimi i drurit dhe tregtimi i produkteve të drurit
• ardhmëria e biomasës
• organizimi i sektorit përmes grupimeve dhe shoqatave
• rëndësia e cilësisë dhe certifikimit

Përveç këtyre temave, një pjesë e rëndësishme e programit do të jetë e lidhur me projektet dhe financimin e BE-së. Do të ketë një treg të idesë së projektit të BE-së, një platformë këmbimi të bursave që jep hapësirë për pjesëmarrësit (kompanitë, institucionet e R & D, shoqatat, konsulentët etj. për të shprehur idetë e tyre dhe për të bashkëpunuar me njëri-tjetrin në projekte.

Ditët e Drurit të Adriatikut përcakton zhvillimet e tregut dhe tregon tendencat në nënsektorët e lidhur me kompanitë e sektorit, pronarët dhe menaxherët e tyre.

Ky event është një mundësi e shkëlqyer për takimin dhe rrjetëzimin me shumë aktorë të rëndësishëm.

Për informacione shtesë dhe regjistrim kontantoni Mrs. Rosana Šimunović:

Email: marketing@drvo-namjestaj.hr

Tel.: +385 98 9282610

Në 27 Nëntor 2017, në Budapest, Hungari, do të zhvillohet  Samiti i 6-të i Drejtuesve të Qeverisë të CEEC dhe Forumit Ekonomik, Financiar dhe Tregtar të Kinës, (16+1)  që organizohet  nga “The Hungarian Trading House (MNKH)”, në bashkëpunim me Agjencinë Hungareze për Promovimin e Investimeve, Bankën Hungareze për Import-Eksport dhe Bankën e Kinës.

Në këtë aktivitet krahas kompanive kineze ftohen të marrin pjesë edhe kompani nga vende të Evropës Qëndrore dhe Lindore, përfshirë dhe Shqipërinë.

Gjatë këtij eventi, do të zhvillohen diskutimi në katër Panele në sektorët e mëposhtëm:

• Teknologjia e Bujqësisë dhe Mjedisit, Menaxhimi i Ujërave
• Finance
• Ndërmarrjet e Vogla dhe të Mesme
• E-commerce, Logjistikë dhe Dogana

Ndërkohë, do të ketë një aktivitet papralel B2B për ndërmarrjet që operojnë në industritë e mëposhtme:

• Teknologji e lartë, IT dhe internet
• Inteligjencë artificiale
• Prodhimi i pajisjeve dhe logjistikë
• Mjekësi dhe Shëndet
• Mbrojtja e mjedisit
• Bujqësia moderne

Kompanitë që marrin pjesë në B2B gjithashtu do të kenë qasje të drejtpërdrejtë në diskutimet e panelit gjatë Forumit. Duke marrë pjesë në B2B, do të keni mundësi të takoni partnerë biznesi kinezë, të cilët do të jenë me interes për kompaninë tuaj nëpërmjet takimeve individuale të paracaktuara. Nëse jeni të interesuar të merrni pjesë në të dyja programet, klikoni këtu  për t’u regjistruar, duke treguar interesat tuaja të biznesit të cilat do t’i lejojnë ekipit B2B në Bankën e Kinës të identifikojë përputhshmërinë e biznesit tuaj me kompanitë kineze që marrin pjesë në aktivitet.

Afati për të aplikuar është 10 Nëntor 2017.

Sipas një raporti të fundit të INSTAT, janë publikuar shifrat e prodhimit të pemëve frutore ku në vitin 2016 ishte 261.754 ton dhe u karakterizua nga një rritje prej 7.6 % krahasuar me një vit më parë.

“Niveli më i lartë i prodhimit të pemëve frutore arrihet në zonën jug-lindore të vendit, në qarkun e Korçës, duke u pasuar nga Elbasani, Fieri, Berati ndërsa Gjirokastra, Lezha dhe Vlora shënojnë nivelet më të ulëta të prodhimit të pemëve frutore”, thuhet në raport.

Përsa i përket frutave dh eperimeve, në vitin 2016 u prodhuan 1.129 mijë ton perime, me një rritje prej 9.6 % krahasuar me vitin 2015. Niveli më i lartë i prodhimit të perimeve në Shqipëri arrihet në qarqet Fier, Tiranë dhe Berat me respektivisht 373.406, 121.661 dhe 120.105 ton. Ndërkohë që qarqet Gjirokastër, Kukës kanë nivelet më të ulëta të prodhimit të perimeve, respektivisht me 13.714 dhe 14.171 ton.

Shqipëria ka kushte klimatike që favorizojnë prodhimin e ullirit. Kështu në vitin 2016 u prodhuan 99075 ton ullinj duke pësuar një rritje 3.2% krahasuar me 2015.

“Sasia më e lartë e prodhimit të ullirit në Shqipëri është e përqendruar në zonat bregdetare dhe fushore me kushte klimatike mesdhetare: në qarkun Fier, Berat, Elbasan dhe Vlore. Zonat verilindore, me klimë të ftohtë, si qarqet Kukës, Korçë dhe Dibër, nuk janë zona të kultivimit të ullirit. Këto zona paraqiten në hartë me ngjyrë më të hapur”, thuhet në raportin e INSTAT-it